Vaibhav Suryavanshi : आयपीएलमध्ये 1 कोटींची कमाई, पण... बिहारकडून खेळताना वैभव सूर्यवंशी किती कमावतो?

आयपीएल 2025 च्या लिलावामध्ये वैभव सूर्यवंशीला राजस्थान रॉयल्सने 1 कोटी 10 लाख रुपयांना विकत घेतलं. आयपीएल इतिहासातला वैभव सूर्यवंशी हा बोली लागलेला सगळ्यात लहान क्रिकेटपटू ठरला. यानंतर गुजरातविरुद्धच्या सामन्यात वैभवने वादळी शतक झळकावलं. आयपीएल इतिहासात शतक झळकावणारा वैभव सगळ्यात लहान क्रिकेटपटू ठरला.

वैभव सूर्यवंशीच्या या कामगिरीनंतर राजस्थान रॉयल्सने त्याला आयपीएल 2026 साठी रिटेन केलं. तसंच वैभवची अंडर-19 तसंच इंडिया ए च्या टीममध्येही निवड झाली. नुकत्याच झालेल्या आशिया कप रायजिंग स्टारमध्ये वैभवने वादळी शतक झळकावलं होतं.

वैभव सूर्यवंशी हा बिहारकडून स्थानिक क्रिकेट खेळतो. रणजी ट्रॉफीच्या पहिल्या राऊंडनंतर आता वैभव बिहारकडून सय्यद मुश्ताक अली टी-20 स्पर्धा खेळत आहे. आयपीएलमध्ये कोट्यवधी रुपये कमावणाऱ्या वैभवला बिहारकडून खेळताना किती पैसे मिळतात? हे अनेकांना माहिती नाही.

बीसीसीआयने वेगेवेगळ्या वयाच्या वर्गात खेळणाऱ्या खेळाडूंसाठी मॅच फी चा वेगळा स्लॅब बनवला आहे. ही मॅच फी खेळाडूने खेळलेली मॅचची संख्या तसंच स्पर्धेचा स्तर यावर अवलंबून असते. खेळाडूंना मानधन प्रती मॅच नाही तर प्रत्येक दिवसासाठी दिलं जातं.

बीसीसीआयच्या नियमानुसार सीनियर पुरुष खेळाडूंना त्यांच्या रणजी ट्रॉफीच्या अनुभवानुसार पैसे दिले जातात. 0 ते 20 मॅच खेळणाऱ्यांना 40 हजार रुपये दिवसाचे, 21 ते 40 मॅच खेळणाऱ्यांना दिवसाचे 50 हजार, तर 41 ते 60 मॅच खेळलेल्यांना दिवसाचे 60 हजार रुपये मिळतात. रणजीची मॅच 4 दिवसांची असते, त्यामुळे खेळाडू 1 लाख 60 हजार ते 2 लाख 40 हजार कमवू शकतो.

अंडर-23 श्रेणीच्या पुरुष खेळाडूंना दिवसाचे 25 हजार, अंडर-19 खेळाडूंना दिवसााचे 20 हजार आणि अंडर-16 खेळाडूंना दिवसाचे 15 हजार रुपये मॅच फी मिळते. खेळाडूंच्या मॅच फी मधून 10 टक्के टीडीएस कट केला जातो, यानंतर उरलेली रक्कम त्यांच्या बँक अकाऊंटमध्ये ट्रान्सफर केली जाते. आयटीआर फाईल केल्यानंतर कट झालेले पैसे खेळाडूंना परत मिळतात.