Devkhel वेबसीरिजवरून वाद! पण देवखेळ म्हणजे नेमकं काय? अंकुश चौधरीनेच सांगितलं

अभिनेता अंकुश चौधरी आणि अभिनेत्री प्राजक्ता माळी यांची देवखेळ ही वेबसीरीज झी 5 वर 30 जानेवारीला प्रदर्शित झाली. पण ट्रेलर लाँच झाल्यापासूनच ही वेबसीरिज वादात आहे. कोकणातील ज्या परंपेवर ही वेबसीरिज आधारित आहे तो देवखेळ म्हणजे नेमकं काय? असा प्रश्न कित्येकांना पडला आहे.

कोकणातील लोकांना दशावतार, देवखेळ याबाबत माहिती आहे. पण इतर ठिकाणी राहणाऱ्या लोकांना याबाबत फारशी माहिती नाही. त्यामुळे देवखेळ म्हणजे काय याबाबत अभिनेता अंकुश चौधरीला एका मुलाखतीत विचारण्यात आलं, तेव्हा त्याने याबाबत माहिती दिली आहे.

अंकुश म्हणाला की, देवखेळ हा कोकणतील शिमग्याच्या निमित्ताने  खूप्र प्रसिद्ध खेळ आहे. या दिवसांत सहा सहा महिने अगोदर चाकरमान्यांनी आपल्या गावी जाण्याचा प्लॅन केलेला असतो. हा सण इतका जिव्हाळ्याचा आणि आत्मियतेचा आहे की यासाठी काही चाकरमाण्यांनी तर नोकऱ्या सोडल्या आहेत. यामध्ये एक पालखी फिरवली जाते. त्यामध्ये सगळे आपल्या खांद्यावर घेऊन नाचत असतात, सगळ्यांच्या घरी ती फेरी जाते असंही तो यावेळी म्हणाला आहे.

दशावतार या फिल्मनंतर देवखेळ या वेबसीरिजच्या माध्यमातून आता कोकणातील संकासूराचा थरार प्रेक्षकांना पाहायला मिळणार आहे. या सीरिजच्या निमित्तानं प्रेक्षकांना पुन्हा एकदा कोकणातील एक नवीन लोककलाप्रकार, तसंच कोकणाचं निसर्ग सौंदर्य पुन्हा एकदा अनुभवायला मिळणार आहे.

कोकणातील फारशा ऐकिवात नसलेल्या लोककथांपासून प्रेरित देवखेळ हा एक गहन सायकोलॉजिकल थ्रीलर आहे. जो शिमगा (होळी) सणाच्या भीतीदायक पार्श्वभूमीवर परंपरा, अंधश्रद्धा आणि गुन्हेगारी यांची सरमिसळ करतो.

रत्नागिरी जिल्ह्यातील देवताली किनारपट्टीवरील गावावर आधारित देवखेळ एका थरारक रहस्यावर आधारित आहे. दरवर्षी होळी पौर्णिमेच्या रात्री, एखाद्याचा मृत्यू होतो. हे मृत्यू न्यायाचं प्रतीक म्हणून स्थानिक पातळीवर पूजल्या जाणाऱ्या शंकासुर या पौराणिक लोककथा व्यक्तिरेखेनेने दिलेल्या दैवी शिक्षेची कृत्ये आहेत, असा गावकऱ्यांचा विश्वास आहे. जेव्हा इन्स्पेक्टर विश्वास सरंजामे गावात येतो, तेव्हा तो अंधविश्वासाला स्पष्टीकरण म्हणून स्वीकारण्यास नकार देतो. ही काळजीपूर्वक लपवून केलेली हत्या असल्याचं त्याचं मत असतं. त्याचा तपास सुरू करतो.

या मालिकेत इन्स्पेक्टर विश्वास सरंजामेच्या भूमिकेत अंकुश चौधरी असून प्राजक्ता माळी, यतीन कार्येकर, अरुण नलावडे, वीणा जामकर आणि मंगेश देसाई यांच्या प्रमुख भूमिका आहेत.