Pune : पुण्यात भाजप आमदाराची अजित पवारांसमोर पोलिसाला मारहाण; आता म्हणतात, फक्त बाजूला ढकललं

चंद्रकांत फुंदे, पुणे, 05 जानेवारी : पुण्यातील ससून रुग्णालयात नूतन इमारतीच्या उद्घाटनाचा कार्यक्रम आयोजित करण्यात आला होता. राज्याचे उपमुख्यमंत्री अजित पवार यांच्यासह  मंत्री हसन मुश्रीफ, सुनील तटकरे यांच्यासह मान्यवरांची उपस्थिती होती. दरम्यान, या कार्यक्रमाच्या सुरुवातीपासूनच स्थानिक आमदार सुनील कांबळे यांच्या आक्रमक पवित्र्याची चर्चा सध्या होत आहे. राष्ट्रवादीच्या वैद्यकीय मदत कक्षाचे प्रमुख जितेंद्र सातव यांना अजित पवार यांच्यासमोरच आमदार सुनील कांबळे यांनी मारहाण केली. याशिवाय कार्यक्रम संपल्यानंतर स्टेजवरून खाली उतरत असताना बाजूला उभा असणाऱ्या पोलीसाला त्यांनी मारले.