ST Bus: मद्यपी चालकांना बसणार लगाम, आता नव्या बसमध्ये ‘ब्रेथ अनालायझर’ यंत्र

पुणे: राज्य मार्ग परिवहन महामंडळाकडून (एसटी) प्रवाशांच्या सुरक्षेला प्राधान्य देत एक महत्त्वाचा निर्णय घेण्यात आला आहे. पुढील वर्षभरात एसटीच्या ताफ्यात नव्या बस दाखल होणार आहेत. या नव्या बसमध्ये चालकाजवळ ब्रेथ अ‍ॅनालायझर यंत्र बसवले जाणार आहे. या यंत्रणेमुळे चालकाने बस सुरू करण्यापूर्वी श्वास परीक्षण करणे बंधनकारक असेल. परीक्षणात मद्यपान केल्याचे आढळल्यास बस सुरू होणार नाही. नव्या बस खरेदी करताना ही यंत्रणा बसवण्याची अट ठेवण्यात आली आहे. त्यामुळे मद्यपी चालकांवर नियंत्रण येणार असून, प्रवाशांच्या सुरक्षिततेत वाढ होणार आहे.