कड्यावर अडकलो, झोप लागली, 5 दिवस भरकटलो, सिंहगडावरून बेपत्ता झालेल्या गौतमने सांगितला थरार

पुणे: मागील पाच दिवसांपासून गौतम गायकवाड प्रकरण चांगलंच चर्चेत आहे. २४ वर्षीय गौतम गायकवाड आपल्या काही मित्रांसह पुण्यातील सिंहगड फिरायला गेला होता. पण तो अचानक बेपत्ता झाला. तो कुठे गेला? त्याच्यासोबत काय घडलं? याचा काहीच थांगपत्ता लागत नव्हता. सिंहगडावरील तानाजी कड्याजवळ गौतमची एक चप्पल आढळून आली होती. त्यामुळे तो कड्यावरून खाली पडला असावा, असा अंदाज वर्तवण्यात आला. तो पाच दिवस बेपत्ता होता. यानंतर तो सिंहगडाजवळील एका दरीत जखमी अवस्थेत आढळला आहे. त्याच्या अंगात त्राण नव्हता. शरीरावर अनेक ठिकाणी जखमा होत्या.