यळकोट यळकोट, जय मल्हार!, जेजुरी गडावर जयघोषात विधिवत घटस्थापना, VIDEO

पुणे - आजपासून नवरात्रोत्सवाला प्रारंभ होत असल्याने सर्वत्र उत्साह पाहायला मिळत आहे. महाराष्ट्राचे कुलदैवत असलेल्या जेजुरीच्या खंडेरायाची सकाळी 11:30 वाजता परंपरेनुसार विधिवत घटस्थापना करण्यात आली आणि नवरात्रोत्सवास प्रारंभ करण्यात आला. याचबाबत लोकल18 च्या टीमने वेदमूर्ती शशिकांत सेवेकरी यांच्याशी विशेष संवाद साधला. यावेळी ते काय म्हणाले, जाणून घेऊयात.

आज नवरात्रोत्सवाच्या निमित्ताने खंडेरायाचा मुख्य गाभारा पाना-फुलांनी सजविण्यात आला आहे. तसेच गडकोट आवाराला विद्युत रोषणाई करण्यात आली आहे. ग्रामस्थांना व येणाऱ्या भाविकांना नवरात्र उत्सव काळात उंबऱ्यातून दर्शनाचा लाभ मिळणार आहे. श्री खंडोबा मंदिरामध्ये उत्सवानिमित्त विविध धार्मिक विधी केले जात आहेत. प्रतिदिन वाघ्या मुरळी, गोंधळी स्थानिक कलावंत गडावर गाणी म्हणून उपस्थित असतात. या निमित्ताने मराठी संस्कृतीचे दर्शन देखील होते, अशी माहिती वेदमूर्ती शशिकांत सेवेकरी यांनी दिली.