पुण्यातील सलून व्यावसायिकानं संपवलं आयुष्य; आता पत्नीविरोधातच गुन्हा दाखल, नेमकं काय घडलं?

महेश दत्तात्रय क्षीरसागर (वय ४०, रा. गिरीधरनगर, वारजे माळवाडी) असे आत्महत्या केलेल्या व्यक्तीचे नाव आहे. महेश यांचे लग्न १३ वर्षांपूर्वी झाले होते. मात्र, लग्नानंतर काही काळानंतर पती-पत्नीमध्ये कौटुंबिक कारणावरून खटके उडू लागले. महेश यांचे वडील दत्तात्रय बाबूराव क्षीरसागर (वय ६८) यांनी दिलेल्या फिर्यादीनुसार, महेश आणि त्यांची पत्नी प्रतिभा महेश क्षीरसागर (वय ३५) यांच्यात वारंवार भांडणे होत होती.

महेश क्षीरसागर हे शिवणे परिसरातील दांगट इस्टेट येथील एका सोसायटीत वास्तव्यास होते. पती-पत्नीमधील वादाने इतके भीषण स्वरूप धारण केले की, महेश यांनी मानसिक तणावातून २ फेब्रुवारी रोजी राहत्या इमारतीच्या चौथ्या मजल्यावरून उडी मारली. या घटनेत त्यांचा मृत्यू झाला. सुरुवातीला या प्रकरणाची नोंद झाली असली तरी, पोलिसांच्या सखोल तपासानंतर आणि वडिलांच्या तक्रारीनंतर आता पत्नीवर कायदेशीर कारवाई करण्यात आली आहे.

वारजे माळवाडी पोलिसांनी मंगळवारी प्रतिभा क्षीरसागर यांच्याविरुद्ध आत्महत्येस प्रवृत्त केल्याच्या आरोपावरून गुन्हा दाखल केला आहे. पोलीस उपनिरीक्षक लुगडे या प्रकरणाचा अधिक तपास करत आहेत. १३ वर्षांच्या सुखी संसाराचा असा करुण अंत झाल्याने परिसरात हळहळ व्यक्त केली जात आहे.