Pune News: पुणेकरांचा 'वेग' होणार कमी! 'या' 3 प्रमुख रस्त्यांवर महापालिका करणार मोठे बदल

आंतरराष्ट्रीय सायकलिंग स्पर्धेसाठी पुणे महापालिकेने आपल्या हद्दीतील ७५ कि.मी. लांबीच्या रस्त्यांची विशेष दुरुस्ती केली होती. सायकलस्वारांना अडथळा येऊ नये म्हणून रस्त्यांवरील चेंबर समपातळीवर आणले गेले आणि सर्व गतिरोधक काढून रस्ते गुळगुळीत करण्यात आले. मात्र, स्पर्धा संपल्यानंतर गणेशखिंड रस्ता, पाषाण रस्ता आणि सेनापती बापट रस्ता यांसारख्या मार्गांवर वाहने अतिवेगाने धावत आहेत. यामुळे ज्येष्ठ नागरिक आणि पादचाऱ्यांना रस्ता ओलांडणे कठीण झाले होते.

नागरिकांच्या वाढत्या मागणीची दखल घेत पथ विभागाने पुन्हा गतिरोधक बसवण्याचे काम हाती घेतले आहे. विशेष म्हणजे, हे गतिरोधक जुन्या पद्धतीचे नसून ते IRC मानकांनुसार शास्त्रीय पद्धतीने तयार केले जातील. यामुळे वाहनांचे नुकसान टाळले जाईल आणि वेगावरही नियंत्रण राहील.