पुणेकरांनी साजरा केला लाडक्या 'क्वीन'चा Birthday, 95 वर्षांची झाली दख्खनची राणी'

पुणे आणि मुंबई या दोन प्रमुख शहरांना जोडणारी डेक्कन क्वीन ही गाडी 1 जून 1930 रोजी सुरू झाली होती. मध्य रेल्वेचा अग्रदूत असलेल्या ग्रेट इंडियन पेनिन्सुला रेल्वेच्या इतिहासातील हा एक महत्त्वाचा टप्पा होता. या प्रदेशातील 2 महत्त्वाच्या शहरांना सेवा देण्यासाठी बनवण्यात आलेली ही पहिली डिलक्स ट्रेन होती. तिला पुण्याचे नाव देण्यात आले होते, ज्याला ‘दख्खनची राणी’असेही म्हटले जाते.

सुरुवातीला ही रेल्वे प्रत्येकी 7 डब्यांच्या 2 रेकसह चालवण्यात आली होती. ज्यापैकी एक स्कार्लेट मोल्डिंगसह चंदेरी आणि दुसरी सोनेरी रेषांसह रॉयल ब्लू रंगाने रंगवलेला होता. मूळ रेकच्या डब्यांच्या अंडर फ्रेम्सची इंग्लंडमध्ये बांधणी करण्यात आली होती. तर कोचच्या बॉडी जीआयपी रेल्वेच्या माटुंगा वर्कशॉपमध्ये तयार करण्यात आली होती.

या गाडीचे वैशिष्ट्य म्हणजे ही भारतातील एकमेव अशी गाडी आहे ज्यात डायनिंग कार आहे. म्हणजेच चालत्या गाडीत हॉटेलसारखे बसून खाण्याची सोय आहे. डेक्कन क्वीनला दख्खनची राणी असे देखील मराठीत संबोधले जाते. या राणीचा दिमाख आणि रुबाब काही असा होता की, पुणे स्टेशनवरून सकाळी 7.15 वाजता निघालेली ही रेल्वे 10 वाजून 20 मिनिटांनी छत्रपती शिवाजी महाराज टर्मिनसला पोहोचत असे. ही रेल्वे धावायला लागली की, अन्य गाड्या बाजूला उभ्या केल्या जात होत्या असं प्रवाश्यांनी म्हटलंय.