Pimpri Chinchwad : काकाच्या बालेकिल्ल्यात पुतण्या रोहित पवारांचं शक्तीप्रदर्शन; अजितदादा गट म्हणाले...

राष्ट्रवादीच्या फुटीनंतर तब्बल तीन महिन्यांनी पिंपरी चिंचवडमध्ये शरद पवार गटाचा शहर अध्यक्ष निवडण्यात आला. आता शरद पवारांच्या गटाचे शहर अध्यक्ष तुषार कामठे हे तरुण नेतृत्व असेल. मात्र, तुषार कामठे हे अजित पवारांचे निकटवर्तीय असल्याने त्यांना आपल्याकडे वळवून पुतण्या रोहित पवारांनी काका अजित पवारांना शह दिल्ल्याच बोलल जात आहे. मात्र, रोहित पवार आज जे प्रयत्न करतायत ते स्वाभाविक असल्याचं सांगत निवडणुका बाबतीत अजून बरच पाणी पुलाखालून जायचं बाकी आहे असं म्हणत अजित पवार समर्थकांनी रोहित पवारांच्या आव्हानाला काडीचेही महत्व दिले नाही.

असं जरी असले तरी पिंपरी चिंचवडमध्ये काका-पुतण्यातील हा संघर्ष पेटणार हे निश्चित मानलं जातंय. कारण आपल्या विचाराशी प्रतारणा करून भाजपशी सलगी करणाऱ्या अजित पवार यांना शह देण्यासाठी थेट शरद पवार यांनीच रोहित पवार यांना पाठबळ दिल्याचं जाणकारांच म्हणण आहे. त्यामुळेच आगामी काळात पिंपरी चिंचवडमध्ये राष्ट्रवादी विरुद्ध राष्ट्रवादी असा सामना रंगला तर नवल वाटायला नको.