Asia Cup : टीम इंडियाचा प्लान बॅकफायर झाला, सूर्या-गंभीर चूक सुधारणार, अन्यथा हातातून जाणार ट्रॉफी!

अभिषेक शर्माने 37 बॉलमध्ये 75 रनची आक्रमक खेळी केली, ज्यात 6 फोर आणि 5 सिक्सचा समावेश होता. अभिषेक शर्माच्या या खेळीनंतरही टीम इंडियाला 20 ओव्हरमध्ये 6 विकेट गमावून फक्त 168 रनच करता आल्या. दुसरीकडे बांगलादेशकडूनही फक्त ओपनर सैफ हसन हाच एक बाजू लढवत होता. सैफ हसनने 51 बॉलमध्ये 5 सिक्स आणि 3 फोरच्या मदतीने 69 रन केल्या. बांगलादेशची टीम 19.3 ओव्हरमध्ये 127 रनवर ऑलआऊट झाली. या सामन्यातही भारतीय टीमने कॅच सोडले.

लिटन दासच्या गैरहजेरीत झाकिर अलीने भारताविरुद्ध बांगलादेशचं नेतृत्व केलं. या सामन्यात बांगलादेशने टॉस जिंकून पहिले बॉलिंगचा निर्णय घेतला. या सामन्यात टीम इंडियाने त्यांच्या बॅटिंग लाईनअपमध्ये बदल केले, पण त्यांचा हा प्लान अपयशी ठरला, त्यामुळे चांगल्या सुरूवातीनंतरही टीम इंडियाला 170 रनचा आकडा गाठता आला नाही.

अभिषेक शर्मा आणि शुभमन गिल ओपनिंगला आले, पण तिसऱ्या क्रमांकावर कर्णधार सूर्यकुमार यादव ऐवजी शिवम दुबे बॅटिंगला आला. तर चौथ्या क्रमांकावर तिलक वर्माऐवजी सूर्यकुमार यादव आला. पाचव्या क्रमांकावर हार्दिक, सहाव्या क्रमांकावर तिलक वर्मा आणि सातव्या क्रमांकावर अक्षर पटेलने बॅटिंग केली. आशिया कपआधी टीम इंडियाचा ओपनर असलेल्या संजू सॅमसनला या सामन्यात बॅटिंगचीच संधी मिळाली नाही. बॅटिंग क्रमवारीमध्ये एवढे चढ-उतार झाल्यामुळे कोणत्याच खेळाडूला छाप पाडता आली नाही.

टीम इंडिया फायनलआधी सुपर-4 मध्ये श्रीलंकेविरुद्ध शेवटची मॅच खेळणार आहे. हा सामना फक्त औपचारिकता असली तरी भारतीय टीमला सर्वोत्तम प्लेयिंग इलेव्हनसह मैदानात उतरावं लागणार आहे, ज्यामुळे फायनलमध्ये कोणतीही घोडचूक होऊ नये.