Ayush Mhatre Record: 17व्या वर्षी मुंबईच्या आयुष म्हात्रेने क्रिकेटमध्ये केला वर्ल्ड रेकॉर्ड; मोडला यशस्वीचा विक्रम

आयुष म्हात्रेने 17 वर्षे 168 दिवसांच्या वयात 181 धावांची खेळी केली. लिस्ट ए क्रिकेटमध्ये (50-50 ओव्हरच्या मॅच) इतक्या कमी वयात एखाद्या फलंदाजाने 150 धावांपेक्षा अधिक धावा करण्याची ही पहिलीच वेळ आहे. यापूर्वी हा विक्रम यशस्वी जायसवालच्या नावावर होता. यशस्वी जायसवालने 17 वर्षे 291 दिवसांच्या वयात झारखंडविरुद्ध दुहेरी शतक झळकावले होते. त्यावेळी यशस्वीने विजय हजारे ट्रॉफीमध्येच 154 चेंडूंत 203 धावांची खेळी केली होती. तेव्हा यशस्वीने 12 षटकार आणि 17 चौकार मारले होते.

यशस्वी जायसवाल सध्या ऑस्ट्रेलिया दौऱ्यावर आहे. भारतीय संघातील बहुतांश फलंदाज ऑस्ट्रेलियाविरुद्धच्या कसोटी मालिकेत फ्लॉप ठरले असताना यशस्वीने मात्र दमदार धावा केल्या आहेत. पर्थमध्ये शतक झळकावणाऱ्या यशस्वीने मेलबर्न कसोटीच्या पहिल्या डावात 82 आणि दुसऱ्या डावात 84 धावा केल्या होत्या.