हा कॅच नाही, चमत्कार आहे! मार्नस लाबुशेनने पकडला ऍशेस इतिहासातला Greatest Catch

ऑस्ट्रेलियन फास्ट बॉलर ब्रेंडन डॉगेटला ही विकेट मिळाली असली तरी मार्नस लाबुशेनच्या कॅचचं सगळीकडे कौतुक होत आहे. डॉगेटने इंग्लंडच्या जोफ्रा आर्चरला त्रास देण्यासाठी शॉर्ट-पिच बॉल टकला. पहिल्या दिवसाच्या अखेरपासून आर्चर चांगला खेळत होता आणि त्याने इंग्लंडचा स्कोअर 300 रनच्या पुढे नेला. दुसऱ्या दिवसाच्या तिसऱ्या ओव्हरमध्ये आर्चरने पूल शॉट मारला, पण बॉल बाऊंड्री लाईनच्या बाहेर जाऊ शकला नाही. डीप फाईन लेगच्या दिशेने बॉल जात असतानाच मार्नस लाबुशेन मिड विकेटवरून धावत आला आणि त्याने सुपरमॅनसारखी उजवीकडे उडी मारली आणि अविश्वसनीय कॅच पकडला.

लाबुशेनने पकडलेला हा कॅच सोशल मीडियावर लगेचच व्हायरल झाला. ऍशेसच्या इतिहासातला हा सर्वोत्तम कॅच असल्याच्या प्रतिक्रियाही अनेकांनी दिल्या आहेत. तर काहींना लाबुशेनचा हा कॅच पाहून ग्लेन मॅकग्राने 2002 च्या ऍशेसमध्ये पकडलेल्या कॅचची आठवण झाली. क्रिकेट ऑस्ट्रेलियाने मॅकग्राने ऍडलेडमध्ये पकडलेल्या मायकल वॉनच्या कॅचचा व्हिडिओदेखील शेअर केला आहे.

ऑस्ट्रेलियाला दुसऱ्या दिवसाच्या सुरूवातीलाच विकेटची गरज होती, कारण पहिल्या दिवसाच्या अखेरीस जोफ्रा आर्चरने ऑस्ट्रेलियन बॉलिंगवर आक्रमण केलं होतं. जोफ्रा आर्चरची विकेट मिळाल्यानंतर इंग्लंडचा 334 रनवर ऑलआऊट झाला. पिंक बॉल ऍशेस टेस्टमधला इंग्लंडचा पहिल्या इनिंगमधला हा सर्वाधिक स्कोअर आहे. जो रूटने ऑस्ट्रेलियन भूमीवर त्याचं पहिलं टेस्ट शतक ठोकलं. जो रूट 138 रनवर नाबाद राहिला, ज्यात त्याने 15 फोर आणि एक सिक्स मारली. रूटच्या शतकामुळे इंग्लंडला 300 रनचा टप्पा ओलांडला.

दुसऱ्या दिवसाच्या खेळाअखेर ऑस्ट्रेलियाने पहिल्या डावात 44 रनची आघाडी घेतली आहे. दिवसाचा खेळ संपला तेव्हा ऑस्ट्रेलियाचा स्कोअर 378/6 एवढा झाला आहे. जेक वेदरल्ड (72) आणि मार्नस लाबुशेन (65) यांनी अर्धशतकं केली, तर कर्णधार स्टीव्ह स्मिथनेही 61 रनची खेळी केली. ट्रॅव्हिस हेड 33 रनवर आऊट झाला. कॅमरून ग्रीन 45 आणि जॉश इंग्लिस 23 रनवर माघारी परतले. दिवसाअखेरीस मायकल नेसर 15 रनवर आणि ऍलेक्स केरी 46 रनवर खेळत आहे.