भारत-पाक सामन्याआधी रोहितसमोर 2 मोठे प्रश्न, गिलचे काय? कशी असेल प्लेइंग इलेव्हन?

वर्ल्ड कपमध्ये पाकिस्ताननं श्रीलंका आणि नेदरलँडचा पराभव केला, तर भारतीय टीमनं ऑस्ट्रेलिया आणि अफगाणिस्तानचा पराभव केलाय. आता दोन्ही टीम शनिवारी आमने-सामने येणार असून त्या जगातील सर्वात मोठ्या नरेंद्र मोदी क्रिकेट स्टेडियममध्ये एकमेकांशी भिडतील. जगभरातील क्रिकेटप्रेमी या मॅचची आतुरतेनं वाट पाहत आहेत. मात्र, या मॅचमध्ये भारतीय कॅप्टन रोहित शर्मा समोर प्लेइंग 11 निवडण्याबाबत मोठा पेच असेल.

दुसरीकडे वर्ल्ड कप स्पर्धेत गिलच्या अनुपस्थितीत ईशान किशननं भारतीय डावाची सुरुवात केली होती. तो ऑस्ट्रेलियाविरुद्धच्या मॅचमध्ये शून्यावर बाद झाला होता. मात्र, अफगाणिस्तानविरुद्धच्या मॅचमध्ये त्यानं 47 रन केले होते. लेफ्ट हँडेड बॅट्समन असल्यानं ईशान भारतीय टीममध्ये ओपनर म्हणून प्रभावी ठरू शकतो.

गिल फिट नसेल तर ईशान खेळणार

वर्ल्ड कप स्पर्धेसाठी निवडण्यात आलेल्या पाकिस्तानच्या टीममध्ये लेफ्ट आर्म पेस बॉलर शाहीन आफ्रिदी आहे. अशा स्थितीत राइट हँडेड बॅट्समन आणि लेफ्ट हँडेड बॅट्समन हा टॉप ऑर्डरमध्ये चांगला पर्याय ठरू शकतो. कारण यामुळे बॉलर्सना त्यांची लाईन व लेंग्थ वारंवार बदलावी लागते. अशा परिस्थितीत शुभमन गिल जर फिट नसेल, तर ईशानचा भारतीय टीममध्ये समावेश होऊ शकतो. अर्थात शाहीनला पाकिस्तानच्या वर्ल्ड कप स्पर्धेत झालेल्या दोन्ही मॅचमध्ये स्वतःची छाप सोडण्यात अपयश आलंय. शाहीनची बॉलिंग श्रीलंकेविरुद्ध तर खूपच महागात पडली. त्याने 9 ओव्हरमध्ये 66 रन देत फक्त 1 विकेट घेतली. नेदरलँड्सविरुद्धही त्याला केवळ 1 विकेट घेता आली.

अहमदाबादमध्ये शमीचं रेकॉर्ड चांगलं

मोहम्मद शमी हा इंडियन प्रीमियर लीग क्रिकेट स्पर्धा अर्थात आयपीएलमध्ये गुजरात टायटन्स टीमकडून खेळतो. अहमदाबाद येथील नरेंद्र मोदी स्टेडियम हे गुजरात टायटन्स टीमचं होम ग्राउंड आहे. यावर्षी झालेल्या आयपीएल 2023 स्पर्धेत शमीनं नरेंद्र मोदी स्टेडियमवरच सर्वात जास्त विकेट घेतल्या आहेत. आयपीएलमध्ये शमीला एकूण 28 विकेट मिळाल्या होत्या. त्यापैकी तब्बल 17 विकेट त्यानं नरेंद्र मोदी स्टेडियमवर घेतल्या होत्या. शमीला येथील मैदान आणि परिस्थिती चांगली माहीत आहे. दुसरीकडे, टीम इंडियानं शार्दुल ठाकूरला गेल्या काही मॅचमध्ये बॅटिंगसाठी संधी दिली असली, तरी तो अपेक्षेप्रमाणे कामगिरी करू शकला नाही. अशा स्थितीत शमीला पाकिस्तानविरुद्धच्या मॅचमध्ये संधी दिली जाऊ शकते.

पाकिस्तानविरुद्ध भारतीय क्रिकेट टीममध्ये जसप्रीत बुमराह आणि मोहम्मद सिराज हे पहिल्या पसंतीचे पेस बॉलर म्हणून खेळतील. भारत या मॅचमध्ये फक्त दोन स्पिनर्ससह खेळू शकतो. अशा परिस्थितीत भारताचा स्पिनर आर अश्विनला टीममध्ये स्थान मिळण्याची शक्यता कमी आहे. पाकिस्तानविरुद्ध स्पिनर म्हणून कुलदीप यादव व रवींद्र जडेजा खेळण्याची शक्यता अधिक आहे.