भारतीय क्रिकेटपटूंना परदेशी लीगमध्ये जायला परवानगी, BCCI ची IPL च्या एकाच टीमला परमिशन!

लखनऊची टीम त्यांच्या काही भारतीय खेळाडूंना प्रशिक्षणासाठी परदेशी लीगमध्ये पाठवत आहे. लखनऊ त्यांचे फास्ट बॉलर आवेश खान आणि मोहसीन खान यांना दक्षिण आफ्रिका टी-20 लीगमध्ये पाठवण्याची तयारी करत आहे. लखनऊचे फास्ट बॉलर SA20 लीग दरम्यान एलएसजी डर्बन सुपरजायंट्सच्या खेळाडूंसोबत प्रशिक्षण घेतील.

SA20 लीग 26 डिसेंबरपासून सुरू होत आहे. लीगमध्ये, आवेश आणि मोहसीन खान डर्बन सुपरजायंट्स प्रशिक्षकांच्या देखरेखीखाली त्यांचे कौशल्य वाढवतील, कारण त्यांच्यापैकी कोणीही सध्या बीसीसीआय किंवा त्यांच्या राज्य संघांशी करारबद्ध नाही. असे असूनही, कोणत्याही नियमांचे उल्लंघन टाळण्यासाठी फ्रँचायझीने बीसीसीआयकडून आधीच पूर्व परवानगी घेतली आहे. बीसीसीआयनेही याला मान्यता दिली आहे. आवेश आणि मोहसीन व्यतिरिक्त, नमन तिवारीला देखील दक्षिण आफ्रिकेत पाठवले जाऊ शकते.

SA20 लीगमध्ये डरबन टीमच्या सपोर्ट स्टाफमध्ये लान्स क्लुजनर, टॉम मूडी, भरत अरुण आणि कार्ल क्रो यांचा समावेश आहे. यापैकी तिघं आयपीएलमध्ये लखनऊच्या कोचिंग स्टाफचा भाग आहेत. लखनऊला आवेश आणि मोहसिन खानला पुन्हा फॉर्ममध्ये आणण्याची गरज आहे. हे दोन्ही खेळाडू दुखापतीमुळे बऱ्याच काळापासून मैदानाबाहेर आहेत. त्यामुळे, आगामी आयपीएल हंगामापूर्वी, हे दोन्ही बॉलर स्वतःला पूर्णपणे तयार करतील.

लखनऊचा फास्ट बॉलर मोहसिन खान दुखापतीमुळे गेल्या हंगामात एकही सामना खेळला नाही. पण, फ्रँचायझीने त्याला कायम ठेवण्याचा निर्णय घेतला. आवेश खान आयपीएल 2025 मध्ये दुखापतीनंतर क्रिकेटपासून दूर आहे. दोन्ही खेळाडू सध्या पुनर्वसन प्रक्रियेतून जात आहेत आणि त्यांनी हळूहळू बॉलिंग सुरू केली आहे. डरबनचा हा दौरा त्यांच्या फिटनेससाठी खूप उपयुक्त ठरेल. मोहसिन आणि आवेश खान हे दोघंही SA20 लीग मध्ये जाणार असले तरी त्यांना लीगच्या मॅच खेळण्याची परवानगी बीसीसीआयने दिली नाही, हे खेळाडू तिथे फक्त ट्रेनिंगच करू शकतील.