कोल्हापूरकरांनी गाजवलं कर्नाटक, चित्तथरारक मोटार स्पर्धेत रचला इतिहास

कर्नाटक पर्यटन, युवा सक्षमीकरण आणि क्रीडा विभागाद्वारे प्रायोजित विजयनगरच्या मोटर स्पोर्ट्स अकॅडमीने उत्सव-दे-हंम्पी २०२३ ही स्पर्धा आयोजित केली होती. साहसी आणि थरारक अशा 4x4 मोटर स्पोर्ट्स ऑफ रोड चॅलेंजच्या या स्पर्धेचे यंदाचे चौथे वर्ष होते.

कर्नाटकात हंपी 4X4 ऑफरोड चॅलेंज ही 800 गुणांची स्पर्धा होती. या साहसी आणि थरारक स्पर्धेमध्ये महाराष्ट्र, विजापूर, हसन, कूर, हैदराबाद, बेंगलोर, कर्नाटक, गोवा, केरळ अशा विविध ठिकाणांवरून 64 गाड्या सोबत 168 स्पर्धक सामील झाले होते. ही स्पर्धा होस्पेटच्या हद्दीतील तुंगभद्रा धरणा शेजारच्या गुंडा या जंगलात पार पडली. दोन दिवस ही स्पर्धा सुरू होती. स्पर्धकांना दोन दिवसात 8 ट्रॅक पूर्ण करण्याचे ध्येय देण्यात आले होते. एका ट्रॅकला 100 गुण ठेवण्यात आले होते. पहिल्या दिवशी 400 आणि दुसऱ्या दिवशी 360 असे एकूण 760 गुण आम्ही मिळवले होते, अशी माहिती अश्विन शिंदे यांनी दिली आहे.

या स्पर्धेत स्टॉक पेट्रोल कॅटेगरी मध्ये 800 पैकी 760 गुणांची कमाई करत कोल्हापूरच्या अश्विन शिंदे आणि कृष्णकांत जाधव या जोडीने प्रथम क्रमांक पटकावला. 800 पैकी 715 गुणांची कमाई करत प्रदीप आणि संदीप (बंगलोर) यांच्या जोडीने द्वितीय क्रमांक पटकावला. तर 800 पैकी 703 गुणांची कमाई करत प्लबन पटनायक आणि शेल्टोन (गोवा) या जोडीने तृतीय क्रमांकावर आपले नाव कोरले. विजयी स्पर्धकांना मेडल, ट्रॉफी, रोख रक्कम, ऑफ-रोड टायर, व्हील आणि इतर वस्तू देऊन सन्मानित करण्यात आले.

मुळात हा खेळ चित्त थरारक आणि साहसी असल्यामुळे आपत्ती व्यवस्थापना वेळी देखील या खेळाचा फायदा झालेला आहे. कोल्हापुरात आलेल्या महापुरात नागरिकांना पुरातून सुखरूप बाहेर काढण्याचे काम देखील केल्याचे खेळाडू अश्विन शिंदे यांनी सांगितले आहे.