Mohammed Shami : ऑस्ट्रेलिया दौऱ्यासाठी फिट नाही म्हणाऱ्या आगरकरला शमीने Video शेअर करत दिलं उत्तर! म्हणाला 'मी इथं फक्त...'

रणजी ट्रॉफी स्पर्धेत उत्तराखंडविरुद्ध बंगालसाठी शमीने सामना जिंकणारी खेळी खेळली. त्यानंतर, क्रिकेट असोसिएशन ऑफ बंगालच्या अधिकृत इंस्टाग्राम हँडलवर शमीचा एक व्हिडिओ पोस्ट करण्यात आला. इंस्टाग्राम व्हिडिओमध्ये, शमी "Im Here to Stay" असे म्हणत असल्याचे दिसत आहे, म्हणजे "मी इथंच राहण्यासाठी आलो आहे, असं म्हणत शमीने एक व्हिडीओ शेअर केला आहे.

रणजी ट्रॉफी मॅचमध्ये बंगाल आणि उत्तराखंड यांच्यात झालेल्या सामन्यात, अनुभवी मोहम्‍मद शमीने सकाळच्या कंडिशन्सचा पुरेपूर फायदा घेतला आणि भेदक मारा केला. शमीने 25 ओव्हरमध्ये केवळ 38 रन देत 4 महत्त्वाचे विकेट घेतले. त्याला आकाश दीप आणि ईशान पोरेल यांनी प्रत्येकी दोन विकेट घेत उत्तम साथ दिली. या शानदार बॉलिंगमुळे उत्तराखंडचा संपूर्ण डाव 265 रनवर आटोपला. शमीने 72 रनवर खेळणाऱ्या चंदेलाला एलबीडब्ल्यू (LBW) बाद करून उत्तराखंडच्या पतनाची सुरुवात केली. यानंतर, लंचनंतर मैदानात परतत शमीने अभय नेगी, जन्मेजय जोशी आणि राजन कुमार यांना आपल्या वेगवान बॉलिंगच्या जोरावर आउट केले. 2 विकेटवर 173 रन अशा मजबूत पोझिशनमध्ये असलेल्या उत्तराखंड संघाची स्थिती शमीच्या माऱ्यामुळे अचानक बिघडली. बंगालने उत्तराखंडचे अखेरचे आठ विकेट अवघ्या 92 रनमध्ये घेतले, ज्यामुळे संपूर्ण उत्तराखंडचा संघ 265 रनवर ऑल आउट झाला.