Cricket Story : 6 बॅले डान्सरना घेऊन रूममध्ये पोहोचला सचिन तेंडुलकर, टीम इंडियाच्या मॅनेजरची उडाली होती झोप!

अजित वाडेकर यांचा 1 एप्रिलला वाढदिवस असतो, 1994 साली वाडेकर टीम इंडियाचे मॅनेजर असताना भारतीय टीम न्यूझीलंडच्या दौऱ्यावर होती. वाडेकरांच्या 53 व्या वाढदिवसानिमित्त 6 बेली डान्सरना बोलावलं होतं. खुद्द अजित वाडेकर यांनी क्रिकेट क्लब ऑफ इंडियाच्या एका कार्यक्रमादरम्यान सचिन तेंडुलकरचा किस्सा सांगितला.

'न्यूझीलंडमधली ही घटना आहे, 1 एप्रिलला माझा वाढदिवस होता. आदल्या दिवशी आमचा सराव छान झाला होता आणि आम्ही लवकर झोपायला गेलो, कारण मला ऑल फूल्स डे ला इतरांना फसवण्याची सवय होती. मी अर्धवट झोपेत होतो, तेव्हा मध्यरात्री बरोबर 12 वाजता सचिन गंभीर चेहऱ्याने माझ्या खोलीच्या दारावर उभा होता,' असं वाडेकर म्हणाले.

'मी सचिनला विचारलं, अशा विचित्र वेळी माझ्या दारावर का आला आहेस? तेव्हा त्याने कपिल देवला काहीतरी झालं आहे, असं मला सांगितलं. मी पँट घालून दोन मजले दूर असलेल्या कपिलच्या खोलीमध्ये गेलो. जेव्हा आम्ही खोलीमध्ये शिरलो तेव्हा संपूर्ण टीम केक आणि शॅम्पेनच्या बॉटलसोबत होती. मला धक्का बसला आणि आश्चर्य वाटले', अशी प्रतिक्रिया अजित वाडेकर यांनी दिली.

'अचानक बाजूच्या खोलीतून सहा बॅले डान्सर्स आत आल्या आणि नाचू लागल्या. मला वाटतं ही सचिनचीच आयडिया असावी, कारण सुनिल गावसकर त्या दौऱ्यावर कॉमेंटेटर होता, पण कुठेच दिसत नव्हता. सनी त्याच्या खोड्यांसाठी प्रसिद्ध आहे, पण ही नक्कीच सचिनची कल्पना असावी', असा किस्सा अजित वाडेकर यांनी सांगितला.

'मी बेली डान्सिंगचा खूप आनंद घेतला आणि शॅम्पेनचे दोन ग्लास प्यायलो, पण नंतर माझ्या लक्षात आलं की सगळेजण निघून जाऊ लागले होते. माझ्यासोबत फक्त एकच बेली डान्सर उरली होती. टीम मॅनेजर असल्यामुळे मला आचारसंहितेचे पालन करून माझ्या खोली परत जावं लागलं', असं वाडेकर म्हणाले.

'आम्ही श्रीलंकेत खेळत होतो, तो रोज वेगवेगळ्या कल्पना सुचवायचा. टीम बैठकीनंतर तो माझ्या खोलीमध्ये येऊन जेवण करायचा, जेणेकरून त्याला त्याचे पैसे द्यावे लागणार नाहीत', असा किस्साही अजित वाडेकर यांनी सांगितला.