आईचं स्वप्न लेकीनं केलं पूर्ण! अवघ्या 18 व्या वर्षी झाली पायलट; कसा होता तिचा खडतर प्रवास?

राजस्थानच्या विजापूरची रहिवासी असलेल्या समायरा हुल्लूरने वयाच्या 18 व्या वर्षीच कमर्शियल पायलट लायसन्स (CPL) मिळवून भारताची सर्वात तरुण पायलट होण्याचा विक्रम केला आहे. आता 18 वर्षांची समायरा लहानपणापासूनच घोडेस्वारी, रॉक क्लायंबिंग आणि पोहणे यांसारख्या साहसी खेळांची शौकीन होती. पायलट बनण्याचं स्वप्न तिच्या आईचं होतं, जे लेकीने पूर्ण केलं. तिची आई नाझिया हुल्लूर विजापूरमधील दिल्ली पब्लिक स्कूलमध्ये समन्वयक (Coordinator) म्हणून कार्यरत आहे. समायराच्या आईला नाझिया हुल्लूर यांना पायलटचा युनिफॉर्म आणि त्याचा मान नेहमीच आकर्षक वाटत असे. त्यांनीच आपली मुलगी समायराला पायलट बनण्याची प्रेरणा दिली आणि तिला पूर्ण पाठिंबा दिला.

समायराने एका मुलाखतीत सांगितलं होतं की, ती पाचवीत असताना विजापूरच्या नवरसपूर महोत्सवात हेलिकॉप्टरमध्ये बसली होती. तिची आई कॉकपिटमध्ये होती आणि युनिफॉर्म पाहून ती खूप प्रभावित झाली होती. काही वर्षांनंतर, दिल्ली विमानतळावर क्रू मेंबर्सना मिळणारा आदर पाहून तिच्या आईने तिला सांगितलं की, 'माझी इच्छा आहे की, तुलाही तुझ्या कामासाठी असाच आदर मिळावा.' नववीत असताना समायराने ठरवलं की, तिला डेस्क जॉब किंवा जास्त अभ्यासाची गरज असलेल्या क्षेत्रात जायचं नाही. तेव्हा तिच्या आईने तिला एव्हिएशन (विमानचालन) क्षेत्राचा सल्ला दिला.