ठाण्यात रस्ते सुरक्षेचा 'नवा फॉर्म्युला'! चिमुरडे बनले 'हेल्मेट अ‍ॅम्बेसेडर'; 'हेल्मेट मॅन ऑफ इंडिया'ची विशेष उपस्थिती

या मोहिमेचे सर्वात मोठे वैशिष्ट्य म्हणजे विद्यार्थ्यांना 'हेल्मेट ब्रँड अ‍ॅम्बेसेडर' म्हणून नियुक्त करण्यात आले आहे. विद्यार्थ्यांनी सायकल चालवताना किंवा दुचाकीवर मागे (Pillion Rider) बसताना स्वतः हेल्मेट वापरणे अनिवार्य आहेच, पण त्यासोबतच त्यांचे आई-वडील किंवा घरातील मोठे लोक विना-हेल्मेट बाहेर पडत असतील, तर त्यांना हेल्मेट घालण्याचा आग्रह धरणे आणि त्यांना नियमांची आठवण करून देण्याचे महत्त्वाचे काम या मुलांना सोपवण्यात आले आहे.

भारताचे 'हेल्मेट मॅन' राघवेंद्र कुमार यांनी यावेळी विद्यार्थ्यांशी संवाद साधला. रस्ते अपघातात आपला मित्र गमावल्यानंतर त्यांनी सुरू केलेले हे मिशन आज देशभरात ओळखले जाते. "लहान मुले जेव्हा पालकांना एखादी गोष्ट सांगतात, तेव्हा त्याचा प्रभाव जास्त पडतो. त्यामुळे रस्ते सुरक्षेचा हा संदेश घराघरात पोहोचवण्यासाठी मुले हे सर्वात प्रभावी माध्यम आहेत," असे मत त्यांनी यावेळी व्यक्त केले.

जिल्हाधिकारी डॉ. श्रीकृष्ण पांचाळ यांनी रस्ते सुरक्षेच्या अंमलबजावणीवर भर दिला. केवळ दंड आकारून बदल होणार नाही, तर लोकांच्या मानसिकतेत बदल होणे आवश्यक असल्याचे त्यांनी नमूद केले. "दुचाकी अपघातात होणाऱ्या मृत्यूंपैकी बहुतांश मृत्यू हे डोक्याला गंभीर दुखापत झाल्यामुळे होतात. हेल्मेट हे केवळ कायद्याचे ओझे नसून ते जीवनरक्षक कवच आहे," असे जिल्हाधिकाऱ्यांनी स्पष्ट केले.

सहभाग: ठाण्यातील विविध शाळांमधील 100 विद्यार्थी.