'मी IPS अधिकारी बोलतोय!' एक फोन कॉल आणि ज्येष्ठ नागरिकाचे बँक खाते रिकामे, ठाण्यात काय घडलं?

ठाण्याच्या घोडबंदर रोड भागात राहणारे नारायण रंगस्वामी हे त्या ज्येष्ठ नागरिकाचे नाव असून त्यांना 29 नोव्हेंबर रोजी दुपारी 1:30 फोन आला. त्यानंतर 4 डिसेंबर 2025 या दरम्यान त्यांना सिस्टम जनरेटेड ऑटोमेटेड अनोळखी मोबाईलवरून क्राईम ब्रँच अधिकारी प्रदीप कुमार आणि आयपीएस अधिकारी विजय खन्ना बोलतो असे मोबाईलवरून कॉलवरून सांगण्यात आले. तुम्ही दुसरा मोबाईल खरेदी केला असून त्यावरून अश्लील मेसेज आणि व्हिडीओ पाठवून लोकांना धमक्या येत आहेत. त्यामुळे तुमच्याविरुद्ध गुन्हा दाखल आहे.

तुम्ही क्राईम ब्रँचशी संपर्क करा, असे सांगून व्हिडीओ कॉलवरून त्यांनी पुन्हा तशीच बतावणी करीत त्यांच्यासह त्यांच्या पत्नीची वैयक्तिक माहिती घेत त्यांचे आधारकार्ड सर्व्हेलन्सला असल्याचे सांगत तुमचा मनी लाँड्रिंग प्रकरणाशी संबंध असल्याचाही त्यांनी असे अनेक आरोप केले. तसेच 538 कोटींच्या मनी लाँड्रिंग प्रकरणात एका घरातून 247 एटीएम कार्ड जप्त झाली. त्यात तुमच्या कॅनरा बँकेच्या खात्यात 27 लोकांनी पैसे पाठविल्याचा तसेच पाच लाखांमध्ये तुमचे खाते मनी लाँड्रिंग प्रकरणात विकल्याचाही त्या फसवणूक कर्त्यांनी आयपीएस अधिकारी असल्याची बतावणी करीत ठाणे शहरातील 70 वर्षीय ज्येष्ठ नागरिकाला मनी लाँड्रिंग प्रकरणात डिजिटल अटकेची अशी भीती दाखवून 21 लाखांचा गंडा घातला. याप्रकरणी फसवणुकीसह माहिती तंत्रज्ञान कायद्याखाली गुन्हा दाखल झाल्याची माहिती कासारवडवली पोलिसांनी रविवारी दिली.

आपली फसवणूक झाल्याचे लक्षात आल्यानंतर नारायण यांनी 11 डिसेंबर रोजी कासारवडवली पोलिस ठाण्यात फसवणुकीचा गुन्हा दाखल केला. आता या फसव्या अधिकाऱ्यांचा शोध घेण्यात येत असल्याचे पोलिसांनी सांगितले.