Thane Crime : CID पेक्षा शॉकिंग स्टोरी! नदी पात्रात मिळाला कुजलेल्या अवस्थेतील मृतदेह; पोलिसांसमोर उभे राहिले नवे प्रश्न

पोलिसांनी घटनास्थळी धाव घेतल्यावर मृतदेहाची अवस्था पाहून हा मृतदेह किमान दीड ते दोन महिन्यांपूर्वीचा असल्याचा प्राथमिक अंदाज वर्तवला. मृतदेह इतका कुजलेला होता की त्याची ओळख पटवणे जवळजवळ अशक्य झाले होते. चेहरा ओळखू न येण्याच्या स्थितीत होता तर शरीरावरचे कपडेही नष्ट झाले होते. त्यामुळे मृत व्यक्तीची कोणतही ओळख होऊ शकली नाही. सध्या या मृत्यूचे कारणही स्पष्ट होत नसल्याने गुन्हा किंवा अपघात याबाबतची शंका पोलिसांना येत आहे.

घटनास्थळावरून कोणतेही शस्त्र किंवा संशयास्पद साहित्य सापडले नसले तरी मृतदेह ज्या पद्धतीने टाकण्यात आला आहे, त्यावरून संशय वाढत चालला आहे. पोलिसांनी तातडीने मृतदेह पंचनामा करून तो मुंबई फॉरेन्सिक लॅबमध्ये पाठवला आहे. डीएनए चाचणी, हाडांची तपासणी आणि इतर वैज्ञानिक विश्लेषणानंतरच मृतदेहाची ओळख आणि मृत्यूचे कारण स्पष्ट होण्याची शक्यता आहे.

दरम्यान जवळपासच्या गावांतील हरवल्याच्या तक्रारींची नोंद तपासण्यासाठी पोलीस कर्मचारी प्रयत्न करत आहेत. गेल्या दोन महिन्यांत कोणी बेपत्ता झाल्याची नोंद आहे का याची बारकाईने चौकशी सुरू आहे. स्थानिकांमध्ये मात्र या प्रकरणामुळे दहशतीचे वातावरण आहे. पोलिसांचे पुढील तपास आणि फॉरेन्सिक अहवाल काय सत्य उघड करतात, याकडे साऱ्यांचे लक्ष लागले आहे.