हिजबुल्लाहने इस्रायलला पुन्हा डिवचलं, थेट पंतप्रधानांच्या घरावर हल्ल्याचा प्रयत्न

मुंबई: इस्रायल आणि पॅलेस्टिनी संघटना हमास यांच्यात 7 ऑक्टोबर 2023 पासून युद्ध सुरू आहे. गाझापट्टीवर सुरू असलेल्या युद्धात लेबनानमधून कार्यरत असलेल्या 'हिजबुल्लाह' या संघटनेनं या युद्धात उडी घेतलेली आहे. तेव्हापासून इस्रायलने लेबनानवरदेखील हल्ले सुरू केलेले आहेत. हिजबुल्लाह देखील इस्रायलला जोरदार प्रतिकार करत आहे. हिजबुल्लाहने आता पुन्हा एकदा लेबनानमधून इस्रायली इमारतीवर ड्रोन हल्ला केला आहे. या हल्ल्याच्या माध्यमातून इस्त्रायलचे पंतप्रधान बेंजामिन नेतन्याहू (Benjamin Netanyahu) यांच्या घराला टार्गेट करण्याचा प्रयत्न करण्यात आला आहे. इस्रायलमधील 'हैफा सीझेरिया' भागात हा हल्ला करण्यात आला.