रशियाचा भारतीय कंपनीवर क्षेपणास्त्राने हल्ला; युक्रेनचा दावा, फोटो शेअर केल्याने खळबळ उडाली

युक्रेनमधील ब्रिटिश राजदूत मार्टिन हॅरिस यांनी या हल्ल्यानंतरच्या गोदामाच्या स्थितीचे एक छायाचित्र सर्वप्रथम शेअर केले. भारतातील युक्रेनियन दूतावासाने हेच छायाचित्र पुन्हा पोस्ट करत म्हटले आहे की, आज रशियन क्षेपणास्त्राने युक्रेनमधील भारतीय औषध कंपनी कुसुमच्या गोदामावर हल्ला केला. भारतासोबत 'विशेष मैत्री'चा दावा करत असताना मॉस्को हेतुपुरस्सर भारतीय व्यवसायांना लक्ष्य करत आहे. लहान मुले आणि वृद्धांसाठी असलेली औषधे नष्ट करत आहे.

ब्रिटिश राजदूत हॅरिस यांनी आपल्या ट्विटमध्ये म्हटले की, हे औषध कंपनीचे गोदाम युक्रेनची राजधानी कीव्ह (Kyiv) येथे होते. राजदूत आणि युक्रेनियन अधिकाऱ्यांनी सोशल मीडिया एक्सवर शेअर केलेल्या या छायाचित्रांची स्वतंत्रपणे पडताळणी करता आलेली नाही. रशियाकडून या आरोपांवर तात्काळ कोणतीही प्रतिक्रिया आलेली नाही.

दुसरीकडे अमेरिकेचे राष्ट्राध्यक्ष डोनाल्ड ट्रम्प (Donald Trump) रशिया-युक्रेन युद्ध संपवण्यासाठी रशियावर दबाव आणत आहेत. अमेरिकेचे विशेष दूत स्टीव्ह विटकॉफ (Steve Witkoff) यांनी शुक्रवारी रशियाचे राष्ट्राध्यक्ष व्लादिमीर पुतिन (Vladimir Putin) यांच्यासोबत सेंट पीटर्सबर्ग येथे चार तासांहून अधिक काळ चर्चा केली. या चर्चेनंतर राष्ट्राध्यक्ष ट्रम्प यांनी त्यांचे रशियन समकक्ष पुतिन यांना युक्रेनसोबतचे "निरर्थक युद्ध" (senseless war) लवकर संपवण्यासाठी वेगाने पावले उचलण्याचे आवाहन केले.

ट्रम्प मॉस्को आणि कीव्ह यांच्यात युद्धविराम करारासाठी प्रयत्न करत आहेत. परंतु रशियन आणि अमेरिकन अधिकाऱ्यांमध्ये वारंवार वाटाघाटी होऊनही क्रेमलिनकडून (रशियन सरकार) कोणतीही मोठी सवलत किंवा तडजोड मिळवण्यात त्यांना अपयश आले आहे. चर्चेचा मुख्य विषय युक्रेनियन समझोता असल्याचे क्रेमलिनने म्हटले आहे. मात्र कोणताही मोठा निर्णय झाला नाही.