लग्नात दारू आणि डीजे नसेल तर मिळणार चक्क 21,000 रुपये, कुठे झाला निर्णय?

दारू व डीजेवर खर्च होणाऱ्या पैशांची बचत व्हावी व दारूचं सेवन कमी व्हावं, शांततेत लग्न सोहळे पार पडावे यासाठी हा निर्णय घेतला आहे. ग्रामपंचायतीतील सदस्यांनी अशा कार्यक्रमांमध्ये होणारा अवाजवी खर्च आणि उच्च डेसिबल आवाजामुळे होत असलेल्या त्रासाबद्दल चिंता व्यक्त केली होती. आता या नवीन उपक्रमामुळे लग्न सोहळे शांततेत प्रेमाने साजरे करतील, ज्यामुळे समाजात सकारात्मक बदल घडतील, अशी आशा आहे. यापुढे लग्नसोहळे हे प्रेम व आनंद देणारे सोहळे ठरतील, अशी अपेक्षा त्यांनी व्यक्त केली.

गावात लग्न सोहळ्यात पाहुण्यांसाठी दारू मागवली जाते आणि मोठ्या आवाजात डीजे वाजवला जातो. काही वेळा अशा प्रसंगात भांडणं देखील होतात. डीजेच्या आवाजामुळे मुलांच्या अभ्यासात व्यत्यय येतो. लग्न समारंभ शांततेत व्हावे, असा या निर्णयामागचा हेतू आहे, असं सरपंचांनी सांगितलं. ग्रामपंचायतीने एक ठराव मंजूर केला आहे, त्याअंतर्गत लग्न समारंभात जे कुटुंब दारूची सोय करणार नाही व डीजे वाजवणार नाही, त्यांना 21,000 रुपये रोख रक्कम बक्षीस म्हणून देईल. बल्लो गावाची एकूण लोकसंख्या पाच हजार आहे. या उपक्रमाचा उद्देश गावकऱ्यांना दारू आणि अवाजवी खर्चापासून दूर राहण्यासाठी प्रोत्साहित करणे हा आहे, जेणेकरून विवाह सोहळे शांततेत पार पडतील, असं सरपंचांनी सांगितलं.