निष्काळजीपणा भोवला! शेतातील आग वनक्षेत्रात, शेतकऱ्याला 100 झाडे लावण्याची शिक्षा!

हे प्रकरण 23 मार्च 2025 रोजी घडले होते. घारेवाडीतील संबंधित शेतकऱ्याने आपल्या शेताच्या बांधाला आग लावली होती. मात्र, ही आग इतरत्र पसरू नये यासाठी कोणतीही पुरेशी खबरदारी घेतली नाही. परिणामी, ही आग वेगाने जवळच असलेल्या वनविभागाच्या कंपार्टमेंट क्रमांक 704 मध्ये पसरली. या आगीमुळे वनसंपत्तीचे मोठ्या प्रमाणात नुकसान झाले. वनविभागाच्या कर्मचाऱ्यांनी तात्काळ घटनास्थळी धाव घेऊन आग आटोक्यात आणण्याचा प्रयत्न केला, पण तोपर्यंत बराच भाग जळून खाक झाला होता.

या घटनेनंतर, वनविभागाने संबंधित शेतकऱ्याला ताब्यात घेऊन वन अधिनियमानुसार गुन्हा दाखल केला. या प्रकरणाची सुनावणी प्रथमवर्ग न्यायदंडाधिकाऱ्यांसमोर झाली. न्यायालयाने सर्व बाजू तपासून शेतकऱ्याला दोषी ठरवले आणि त्याला 3 हजार रुपयांचा दंड तसेच 100 झाडे लावण्याची शिक्षा ठोठावली.