इडा पिडा टळू दे..! बळीराजाला अनोखी मानवंदना, तब्बल 40 एकरावर साकारलं क्रॉप पेंटिंग

धाराशिव: ‘इडा पिडा टळू दे, बळीचं राज्य येऊ दे’ ही म्हण गेल्या हजारो वर्षांपासून जनमानसात रुजलेली आहे. आज बलिप्रतिपदा म्हणजे दिवाळी पाडवा. याच सणाचे औचित्य साधून धाराशिव जिल्ह्यातील तुळजापूर तालुक्यातील इटकळ येथे 40 एकरावर बळीराजाचं क्रॉप पेंटिंग साकारण्यात आलंय. तब्बल 40 एकरावर बळीराजाचा पेंटिंग साकारून कलाकार मंगेश निपाणीकर यांनी बळीराजाला अनोखी मानवंदना दिलीय.

धाराशिव जिल्ह्यातल्या तुळजापूर येथील ईटकळ येथे नागनाथ अक्कलकोटे यांचे 40 एकर पडीक जमीन आहे. या जमिनीवर ही कलाकृती साकारण्यात आलीये. त्यासाठी सोयाबीन, मूग, ज्वारी आणि मका अशा पिकांची पेरणी केली. अनेक संकटांवर मात करीत रासायनिक खतांचा वापर न करता ही पिके वाढवली. या पिकांचे क्रॉप कटिंग करून त्यांनी ही कलाकृती साकारली. तब्बल चार ते पाच ट्रॅक्टरच्या माध्यमातून ही पडीक जमीन त्यांनी सुपीक केली. त्यासाठी 30 ते 35 जण दररोज दहा तास काम करीत होते, अशी माहिती निपाणीकर यांनी दिली.

दरम्यान, आजच्या बदलत्या शेती पद्धतीमध्ये नवनवीन प्रयोग होत आहेत. अनेकदा संकरित बियाणे, रासायनिक किटकनाशके तसेच खतांची निर्मिती झाल्याने उत्पादन वाढवण्यासाठी त्यांचा बेसुमार वापर होत आहे. त्यामुळे दिवसेंदिवस शेती नापीक बनत चालली आहे. हा वाढता धोका लक्षात घेता, आता सेंद्रिय शेतीकडे वळण्याची गरज आहे. याबाबत सर्वसामान्य शेतकऱ्यांत जनजागृती व्हावी, या हेतुने लेखक शरद तांदळे यांच्या संकल्पनेतून मंगेश निपाणीकर यांनी ही कलाकृती साकारली आहे