वडील भावाशी लग्न लावत होते, तरुणी घरातून पळाली आणि थेट देशाच्या सेवेत दाखल!

23 वर्षांची हमना जफर 19 वर्षांची असताना तिच्या वडिलांनी तिचं लग्न तिच्या चुलत भावाशीच लावण्याचं ठरवलं. लग्नाची तयारीही झाली होती. पण हमानाला हा निर्णय योग्य वाटला नाही. तिला स्वतःच्या अटींवर जगायचं होतं. शेवटी एक दिवस ती घरातून पळून गेली. संघर्षांचा सामना केला आणि आज ती अमेरिकन सैन्याची योद्धा आहे. तिची ही प्रेरणादायी कहानी चांगलीच चर्चेत आलीय.

न्यूयॉर्क पोस्टच्या वृत्तानुसार, हमना जफरचे आई-वडील अमेरिकेतील मेरीलँडमध्ये राहत होते, परंतु ते कधीही अमेरिकन संस्कृती स्वीकारू शकले नाहीत. हमना त्याच शाळेत शिकली होती, त्यामुळे तिला स्वतःच्या आवडीचं आयुष्य जगायचं होतं. या अमेरिकन स्वप्नाची तिला मोठी किंमत चुकवावी लागली. एके दिवशी तिचे आई-वडील म्हणाले, आपल्याला पाकिस्तानला जायचे आहे. हमनाही दागिने आणि ड्रेस घालून तयार झाली आणि पाकिस्तानला पोहोचली. पण तिथं तिचं एंगेजमेंट झाल्याचं समोर आलं. त्यानंतर तिच्या स्वप्नांचा चुराडा झाला.

हमनाला हा निर्णय मान्य नव्हता. तिला लष्कराच्या अधिकाऱ्याची मदत मिळाली. हमनाने बरेच दिवस हॉटेलमध्ये राहून काढले. दरम्यान, कोविड लॉकडाऊन आला. हमनाला वाटलं की तिला आता घरी जावं लागेल. पण नंतर क्लॉडिया बॅरेरा या मैत्रिणीने तिला मदत केली. तिला घरी नेले. क्लॉडिया आणि तिचा नवरा हमनाची स्वप्ने पूर्ण करण्याचा निर्धार केला होता. अखेरीस हमना अमेरिकन हवाई दलात दाखल झाली.

क्लॉडिया म्हणाली, हमनाची खूप प्रबळ इच्छाशक्ती आहे. जफरची इच्छा आहे की तिच्या कुटुंबाने तिची क्षमता पाहावी आणि त्यांना तिचा अभिमान वाटावा, परंतु त्यांच्याशी संपर्क करण्याचा अनेक प्रयत्न करूनही त्यांनी प्रतिसाद दिला नाही. तिच्याकडे अजूनही क्लॉडियाचे कुटुंब आहे, जे तिला मुलीसारखं वागवतात.

दरम्यान, जगात अशा अनेक मुली, मुलं आहेत ज्यांना आपल्या पालकांच्या विरोधात जाऊन काही निर्णय घ्यावे लागतात. मात्र दुसरीकडे काहींमध्ये धाडस आणि कोणाची साथ नसल्यामुळे ते पालकांच्या त्या निर्णयाला स्विकारतात आणि तसंच आयुष्य जगतात. त्यामुळे अनेक मुली आणि मुलांसाठी हमना एक प्रेरणा ठरु शकते.