Truck Accident : नशेत हातात घेतलं स्टेअरिंग, ट्रकवरचा ताबा सुटला आणि... डॉश कॅमेरात कैद झाला मृत्यूचा थरार

मिळालेल्या माहितीनुसार, हा अपघात कॅलिफोर्नियातील ओंटारियो परिसरातील 10 फ्रीवे वर घडला. 21 वर्षांच्या एका युवकाने चालवलेल्या ट्रकने समोरून येणाऱ्या सुमारे 8 वाहनांना चिरडलं. या भीषण अपघातात तीन लोकांचा मृत्यू झाला असून चार जण जखमी होऊन रुग्णालयात दाखल आहेत. पोलिसांच्या म्हणण्यानुसार, हा चालक युबा सिटीचा रहिवासी आहे आणि तो गाडी चालवताना नशेत होता, असा संशय व्यक्त करण्यात आला आहे. सध्या त्याला ताब्यात घेण्यात आलं आहे.

या घटनेचा व्हिडिओ सोशल मीडिया प्लॅटफॉर्म ‘X’ (माजी Twitter) वर @CollinRugg या हँडलवरून शेअर करण्यात आला आहे. केवळ 6 तासांत या पोस्टला 9 लाखांहून अधिक व्ह्यूज मिळाले आहेत. व्हिडिओसोबत दिलेल्या कॅप्शनमध्ये या अपघाताची संपूर्ण माहिती सांगण्यात आली आहे. या व्हिडिओमध्ये ट्रकसमोर जे काही आलं ते थेट रस्त्यावर चिरडल्याचं स्पष्ट दिसतं.

या भयानक व्हिडिओनंतर यूजर्स कमेंट सेक्शनमध्ये आपल्या भावना व्यक्त करत आहेत. एक यूजरनं लिहिलं, 'अत्यंत भीषण घटना, जखमी आणि त्यांच्या कुटुंबासाठी प्रार्थना.' तर दुसरा यूजर लिहितो, "मी माझ्या कुटुंबातील पाच सदस्यांना अशाच एका निष्काळजी ट्रक चालकामुळे गमावलं."

अशा घटना पुन्हा एकदा दाखवून देतात की वेग आणि निष्काळजीपणा किती प्राणघातक ठरू शकतो. एका क्षणाची चूक कित्येकांचे आयुष्य उद्ध्वस्त करू शकते.