'या' देशात थम्सअप करणं समजलं जातं अश्लील, अंगठा दाखवल्यास होऊ शकतो तुरुंगवास

इराणमध्ये थम्सअप केल्यास गैरसमज आणि वाद होऊ शकतात. जर तुम्ही इराणला जात असाल तर तिथल्या बोटांचे इशारे समजून घ्या, नाहीतर तिथे गेल्यावर असे करणे महागात पडू शकते.

इराणमधील लोक सहसा हाताने इशारे करत नाहीत. असं करणे म्हणजे अपमानास्पद मानलं जातं. जगभरात, दोन मधल्या बोटांनी इंग्रजी व्ही अक्षरासारखं चिन्ह दाखवणं ‘व्हिक्ट्री’ म्हणजेच विजय किंवा शांतीशी जोडलं जातं, मात्र इथे तो अश्लील इशारा समजला जातो. तो अपमान म्हणून घेतला जातो. तुम्ही एखाद्या व्यक्तीकडे बोट दाखवून या इशारा करत असाल तर ते चांगलं मानलं जात नाही, हे आक्रमक आणि असभ्य आहे असं म्हणतात. तुम्ही व्यक्तिऐवजी वस्तूकडे बोटांनी इशारा करू शकता.

इराणसह अनेक मध्यपूर्व संस्कृतींमध्ये डाव्या हाताला अशुद्ध मानतात. एखादी वस्तू देण्यासाठी इथे डावा हात वापरणं अपमानास्पद मानलं जातं. यात हात मिळवण्याचाही समावेश आहे. जर एखाद्याने दुसऱ्या व्यक्तीशी डावा हात मिळवला तर तो समोरच्या व्यक्तीचा अपमान करत आहे, त्याला बेकार समजतोय किंवा त्याचा अपमान करतोय असं समजलं जातं.

थम्सअप करणं इराणप्रमाणे अफगाणिस्तानातही अश्लील किंवा अपमानास्पद समजलं जातं. इटलीच्या काही भागांमध्ये, अंगठा दाखवणं असभ्य मानतात. मात्र ते इराण आणि अफगाणिस्तानइतकं अपमानास्पद नाही. ग्रीस आणि इराकमध्येही अंगठा दाखवणं अश्लील मानले जाते.

व्हिएतनाममध्ये बोटं क्रॉस करणं अश्लील समजतात. याची तुलना महिलांच्या जननेंद्रियाशी केली जाते. यामुळे ते अपमानास्पद मानलं जातं. मलेशियामध्ये तर्जनीने इशारे करणं असभ्य समजतात. त्याऐवजी अंगठा वापरलेला चालतो.