दु:खद! छ. संभाजीनगरमध्ये मक्याची टाकी फुटली, मक्याखाली दाबून 4 जणांचा मृत्यू

छ. संभाजीनगर : छत्रपती संभाजीनगर मधील शेंद्रा एमआयडीसीमध्ये मक्याची टाकी फुटल्याची घटना शुक्रवारी( 15 नोव्हेंबर) रोजी घडली आहे. यामध्ये मक्याखाली दाबून 4 जणांचा मृत्यू झाला आहे. मद्यनिर्मिती कारखान्यात ही घटना घडली आहे. मिळालेल्या माहितीनुसार सदर टाकीमध्ये 3 हजार टन इतकी मका होती. मात्र अचानक टाकी फुटल्याने आजूबाजूच्या परिसरात काम करणारे चार मजूर हे मक्याखाली दाबले गेले. घटनेची माहिती मिळताच अग्निशमन दल आणि पोलिसांनी घटनास्थळी धाव घेत पीडितांना ढिगाऱ्यातून बाहेर काढण्याचे प्रयत्न केले. मात्र घटनेत त्यांचा मृत्यू झाला. किसन हिरडे (50), विजय गवळी ( 40) दत्तात्रय बोरडे (40) असे मृत व्यक्तींचे नावे असून एका मृत व्यक्तीची ओळख न पटल्याची माहीती आहे. तर प्रशांत सोनवणे, प्रसाद काकड, वाल्मीक शेळके नावाच्या व्यक्ती गंभीर जखमी झाले आहेत.