फळ उत्पादक शेतकऱ्यांसाठी गुड न्यूज! या पिकांना मिळणार संरक्षण कवच

या योजनेअंतर्गत चार अधिसूचित फळपिके डाळिंब, आंबा,पपई आणि संत्रा यांना विमा संरक्षण मिळणार आहे. हवामानातील अनिश्चितता, गारपीट, अतिवृष्टी, वादळ, दुष्काळ किंवा अतितापमानामुळे होणाऱ्या नुकसानीपासून शेतकऱ्यांचे संरक्षण करण्याचा उद्देश या योजनेमागे आहे.

वाशिम जिल्ह्यात ही योजना राबविण्याची जबाबदारी बजाज अलियान्झ जनरल इन्शुरन्स कंपनीकडे देण्यात आली आहे. ही कंपनी शेतकऱ्यांच्या अर्जांची प्रक्रिया, नुकसानभरपाईचे मूल्यांकन आणि विमा रक्कम वितरण या सर्व टप्प्यांचे व्यवस्थापन करेल.

या फळपीक विमा योजनेचा लाभ कर्जदार तसेच बिगरकर्जदार शेतकऱ्यांना घेता येईल. अर्ज प्रक्रिया पूर्णपणे डिजिटल करण्यात आली आहे. शेतकरी पीएमएफबीवाय पोर्टल, बँका, आपले सरकार सेवा केंद्रे किंवा AIDE अॅप द्वारे अर्ज करू शकतात.

या योजनेअंतर्गत केंद्र शासन ३० टक्के, तर राज्य शासन ५ टक्के अतिरिक्त हप्ता उचलणार आहे. उर्वरित हप्ता शेतकरी आणि राज्य शासन प्रत्येकी ५० टक्के प्रमाणात भरणार आहेत. यामुळे शेतकऱ्यांवरील आर्थिक ताण कमी होणार असून, विमा प्रीमियम अधिक परवडणारा होईल.

या योजनेत सहभागी होण्यासाठी किमान २० गुंठे आणि कमाल ४ हेक्टर क्षेत्र मर्यादा निश्चित करण्यात आली आहे. तसेच काही महत्त्वाच्या अटी बंधनकारक आहेत जसे की, ई-पीक पाहणी, फार्मर आयडी, जिओ-टॅग केलेले फोटो हे सर्व नोंदणीसाठी आवश्यक आहेत. फक्त उत्पादनक्षम फळबागांनाच या योजनेचे संरक्षण मिळणार आहे.

शेतकरी इच्छित असल्यास कृषी कार्यालये, विमा कंपनीचे प्रतिनिधी आणि सेवा केंद्रे यांच्या मदतीने अर्ज भरू शकतात. कृषी विभागाने शेतकऱ्यांना अंतिम मुदतीपूर्वी सर्व आवश्यक कागदपत्रांसह नोंदणी पूर्ण करण्याचे आवाहन केले आहे.

नव्या हवामान आधारित फळपीक विमा योजनेमुळे मराठवाडा आणि विदर्भातील फळबाग शेतकऱ्यांना मोठा दिलासा मिळणार आहे. गेल्या काही वर्षांत हवामानातील अतिरेकी बदल, अनियमित पाऊस आणि गारपीटीमुळे शेतकऱ्यांचे प्रचंड नुकसान झाले होते. अशा परिस्थितीत ही योजना शेतकऱ्यांसाठी संरक्षण कवच ठरणार आहे.