दसऱ्याच्या निमित्ताने ऊस उत्पादकांना मोठा दिलासा! या कारखान्याकडून १०६ कोटी रु खात्यात जमा

सन २०२४-२५ गाळप हंगामासाठी कारखान्याने प्रति टन २७५० रुपयांचा भाव जाहीर केला होता. यापैकी शेतकऱ्यांना आधीच २६७० रुपये दिले गेले होते. त्यानंतर २५ सप्टेंबर रोजी झालेल्या गाळप हिशेबानुसार, एकूण ३ लाख ९९ हजार ४४२ मेट्रिक टन उसापोटी ७० रुपये प्रति टन दराने तिसऱ्या हप्त्याची रक्कम थेट शेतकऱ्यांच्या बँक खात्यावर जमा करण्यात आली. यामुळे शेतकऱ्यांना सणासुदीपूर्वी आर्थिक आधार मिळाला आहे.

पूर आणि अतिवृष्टीमुळे अनेक शेतकऱ्यांची पिके वाहून गेली, तर काही ठिकाणी नदी-ओढ्यांना आलेल्या पुरामुळे जीवित आणि वित्तहानी झाली आहे. शासनाकडून मदत मिळण्याची प्रतीक्षा करत असलेल्या शेतकऱ्यांना कारखान्याकडून मिळालेली रक्कम दिलासादायक ठरली आहे. दसऱ्यासारख्या मोठ्या सणापूर्वी निधी मिळाल्याने शेतकऱ्यांच्या चेहऱ्यावर समाधान झळकत आहे.

कारखाना प्रशासनाने स्पष्ट केले आहे की, दिवाळीपूर्वी शेतकऱ्यांच्या खात्यावर चौथ्या हप्त्याची रक्कम जमा केली जाणार आहे. त्यामुळे सणासुदीच्या काळात शेतकऱ्यांना आणखी आर्थिक दिलासा मिळणार आहे.

पूर्णा सहकारी साखर कारखाना २०२५-२६ च्या गाळप हंगामासाठी सज्ज झाला आहे. ऑक्टोबर महिन्यात गाळपास सुरुवात होणार असून, हंगामपूर्व सर्व कामे पूर्ण झाल्याची माहिती कार्यकारी संचालक केशव आकुसकर यांनी दिली. त्यांनी सांगितले की, शासनाच्या निर्देशानुसार गाळप हंगाम सुरू करण्यात येईल आणि शेतकऱ्यांना योग्य दर मिळावा यासाठी कारखाना कटिबद्ध आहे.

तिसऱ्या हप्त्याची रक्कम खात्यावर जमा झाल्यानंतर शेतकऱ्यांमध्ये आनंदाचे वातावरण पसरले आहे. अनेक शेतकऱ्यांनी कारखान्याचे आभार मानत म्हटले की, "अतिवृष्टीमुळे मोठे नुकसान झाले असले तरी सणापूर्वी मिळालेला निधी आमच्यासाठी मोठा आधार आहे."