कांद्याच्या शेतात लावलं 'पैशाचं पीक', 3 वर्षे नो टेन्शन, फक्त तोडायचं अन् विकायचं, कमाई किती? Video

सध्या कांद्याला बाजारात अपेक्षित भाव मिळत नसल्याने दत्तात्रय डोंगरे यांनी पर्यायी उत्पन्नासाठी प्रयोग करण्याचा निर्णय घेतला. त्यांनी शेताची मशागत करून त्यामध्ये भरपूर शेणखत टाकत गुलछडीची लागवड केली. दहा गुंठ्यांमध्ये गुलछडीची लागवड करण्यासाठी त्यांना सुमारे 28 हजार रुपयांपर्यंत खर्च आला. लागवडीनंतर सुमारे चार महिन्यांनी फुलांची तोडणी सुरू झाली. या कालावधीतच लागवडीचा खर्च निघून गेला आणि आतापर्यंत त्यांना सुमारे एक लाख रुपयांचा नफा मिळाला आहे.

विशेष म्हणजे, एकदा लागवड केलेली गुलछडीची झाडे तीन वर्षांपर्यंत उत्पन्न देतात. त्यामुळे पुढील काळातही कमी खर्चात चांगले उत्पन्न मिळणार आहे. या गुलछडीची विक्री सोलापूर जिल्ह्यातून थेट मुंबई येथील दादर फुलबाजारात केली जाते. सणासुदीच्या काळात गुलछडीला मोठी मागणी असते. गेल्यावर्षी या फुलाला प्रति किलो 1600 रुपयांपर्यंत दर मिळाला होता. आता 40 रुपये ते 150 रुपयांपर्यंत दर मिळत आहे. सरासरी 60-70 रुपयांपर्यंत भाव मिळाला तरीही चांगलं उत्पन्न होतं, असं डोंगरे सांगतात.

कांद्यासारख्या पिकासोबत आंतरपीक म्हणून गुलछडीची लागवड केल्यास शेतकऱ्यांना अतिरिक्त उत्पन्नाचा चांगला स्रोत मिळू शकतो, असा सल्लाही प्रयोगशील शेतकरी दत्तात्रय डोंगरे यांनी इतर शेतकऱ्यांना दिला आहे. त्यांच्या या प्रयोगामुळे परिसरातील अनेक शेतकरी गुलछडी लागवडीकडे वळण्याचा विचार करत आहेत.