आधी गॅस सिलेंडर! आता युद्धामुळे शेतकऱ्यांवर मोठं संकट, GTRI चा धक्कादायक अहवाल आला

Global Trade Research Initiative (GTRI) च्या अहवालानुसार, भारतातून पश्चिम आशियात जाणाऱ्या सुमारे ११.८ अब्ज डॉलर किमतीच्या कृषी आणि अन्न उत्पादनांवर या तणावाचा परिणाम होत आहे. यामध्ये तांदूळ, फळे, मसाले आणि प्रक्रिया केलेले अन्नपदार्थ यांचा समावेश आहे.

या संकटाचा सर्वाधिक परिणाम बासमती तांदळाच्या निर्यातीवर झाला आहे. सध्या सुमारे ४ लाख टन बासमती तांदूळ बंदरांवर किंवा सागरी मार्गांवर अडकून पडला आहे.

युद्धजन्य परिस्थितीमुळे शिपिंग कंटेनरची कमतरता निर्माण झाली असून ‘वॉर-रिस्क’ विमा लागू झाल्याने वाहतूक खर्च जवळपास दुप्पट झाला आहे. निर्यातदारांच्या मते, प्रत्येक कंटेनरमागे सुमारे २,००० डॉलर (१.८ लाख रुपये) अतिरिक्त खर्च येत आहे. हा खर्च त्यांना स्वतःच्या नफ्यातून उचलावा लागत असल्याने व्यापारावर मोठा दबाव निर्माण झाला आहे.

निर्यात ठप्प झाल्याचा थेट परिणाम शेतकऱ्यांवर होत आहे. बासमती तांदळाचे दर प्रति क्विंटल ६०० ते ८०० रुपयांनी घसरले आहेत. त्याचप्रमाणे, फळे आणि भाजीपाला निर्यात न झाल्यामुळे देशांतर्गत बाजारात पुरवठा वाढला असून दर कमी झाले आहेत.महाराष्ट्र, कर्नाटक आणि इतर राज्यांतील शेतकरी यामुळे अडचणीत आले आहेत.

या तणावाचा परिणाम मांस आणि सागरी उत्पादनांच्या निर्यातीवरही झाला आहे. २०२५ मध्ये भारताने पश्चिम आशियात सुमारे १६,७३० कोटींची निर्यात केली होती.

जेएनपीटी येथे सुमारे १,००० कंटेनरमध्ये १,२०० कोटी रुपयांचा फळे-भाजीपाला साठा अडकून पडला आहे.

या परिस्थितीचा दुग्ध आणि कुक्कुटपालन क्षेत्रावरही परिणाम झाला आहे. सुमारे २,३६० कोटी रुपयांच्या दुग्धजन्य निर्यातीवर परिणाम झाला आहे.