शेतकऱ्यांवर अतिवृष्टीचे संकट, दसऱ्याच्या दिवशी झेंडूचे दर कडाडणार? मार्केटमधून महत्वाची अपडेट आली समोर

मुंबई : दसऱ्याच्या सणात झेंडूला विशेष महत्त्व आहे. याच कारणामुळे शेतकरी दसरा आणि दिवाळीत मोठ्या प्रमाणावर झेंडू फुलतील याची खात्री करून लागवड करतात. मात्र यावर्षी सातत्याने झालेल्या पावसामुळे इतर पिकांबरोबरच फुलशेतीलाही मोठा फटका बसला आहे. गेल्या चार दिवसांपासून मुसळधार पावसामुळे फुलांची आवक मंदावली असून, बाजारात आलेली भिजलेली फुले कवडीमोल दराने विकली जात आहेत. दुसरीकडे, दर्जेदार आणि ताजी फुलांची मागणी वाढल्याने त्यांचे दर गगनाला भिडले आहेत. त्यामुळे दसऱ्याच्या आदल्या दिवशी बाजारात झेंडू किती प्रमाणात येतो, याकडे विक्रेत्यांचे लक्ष लागले आहे. मोठ्या प्रमाणात झेंडूची आवक झाल्यास दर २० रुपयांवर येऊ शकतात, तर कमी आवक झाल्यास दर २०० रुपयांपर्यंत पोहोचण्याची शक्यता व्यक्त केली जात आहे.