अजित पवार कोणत्या कंपनीच्या विमानाने प्रवास करत होते? किती आहे त्याची किंमत?

अजित पवार कोणत्या विमानातून प्रवास करत होते?

अजित पवार ज्या विमानाने प्रवास करत होते ते लिअरजेट-45 (Learjet 45) असल्याची माहिती समोर येत आहे. हे विमान कॅनडाच्या बॉम्बार्डियर कंपनीने तयार केलेले असून, व्हीआयपी, कॉर्पोरेट आणि चार्टर प्रवासासाठी मोठ्या प्रमाणावर वापरले जाते. वेग, आरामदायी केबिन आणि विश्वासार्हता यासाठी हे जेट ओळखले जाते.

advertisement

लिअरजेट-45 मध्ये आठ प्रवाशांसाठी आरामदायी आसनव्यवस्था असून दोन शक्तिशाली इंजिन्समुळे हे विमान दीर्घ अंतराचा प्रवास कमी वेळेत पूर्ण करू शकते. प्रगत एव्हिओनिक्स प्रणालीमुळे स्थिर आणि सुरक्षित उड्डाणाचा दावा कंपनीकडून केला जातो.

किंमत किती?

किंमतीबाबत बोलायचे झाले, तर उत्पादनाच्या काळात या विमानाची किंमत सुमारे 10 दशलक्ष अमेरिकन डॉलर्स, म्हणजेच अंदाजे 80 कोटी रुपयांपर्यंत होती. सध्या वापरलेल्या लिअरजेट-45 विमानांची किंमत मॉडेल आणि स्थितीनुसार 2.5 ते 4.5 दशलक्ष डॉलर्सदरम्यान असते. सुधारित 45XR आवृत्तीची किंमत याहून अधिक असू शकते.

या विमानाचा वार्षिक ऑपरेटिंग खर्चही मोठा असून तो सुमारे 6 ते 8 लाख अमेरिकन डॉलर्सपर्यंत जातो. चार्टर सेवेसाठी प्रति तास 3,000 ते 4,500 डॉलर्स इतका खर्च अपेक्षित असतो.

विमान वाहतूक क्षेत्रात या विमानाला अनेकदा 'लॅम्बोर्गिनी' असेही म्हटले जाते. कारण याचे इंजिन आणि एरोडायनॅमिक डिझाइन अत्यंत टोकदार आणि चपळ आहे. हे विमान जमिनीपासून ५१,००० फूट उंचीपर्यंत उडू शकते, जी उंची सामान्य व्यावसायिक विमाने (उदा. एअरबस किंवा बोईंग) गाठू शकत नाहीत.या विमानाचे सर्वात मोठे वैशिष्ट्य म्हणजे हे विमान छोट्या धावपट्टीवरही (Short Runways) सहजपणे उतरू शकते. यामुळेच मोठी विमाने जिथे जाऊ शकत नाहीत, अशा बारामतीसारख्या छोट्या विमानतळांवर हे विमान उतरवण्यासाठी प्राधान्य दिले जाते.