आगामी महापालिका आणि स्थानिक स्वराज्य संस्थांच्या निवडणुकीच्या पार्श्वभूमीवर शिवसेना शिंदे गटाने जोरदार प्रयत्न सुरू केले आहेत. शिवसेना ठाकरे गटाचे माजी नगरसेवक खेचण्यासाठी जोरदार प्रयत्न सुरू आहेत. मुंबईत शिवसेना ठाकरे आणि भाजप वगळता इतर सर्व पक्षांचे जवळपास 123 नगरसेवक एकनाथ शिंदेंनी आपल्याकडे खेचले आहेत. हे नगरसेवक मागील काही टर्ममधील आहेत.
शिवसेनेत फूट पडल्यानंतर एकनाथ शिंदेंनी मुंबईवरही आपले लक्ष केंद्रीत केले. मुंबईतील काही आमदारांनी शिंदे यांना बंडात साथ दिली. त्यानंतर शिंदे यांनी आपला मोर्चा नगरसेवकांकडे वळवला आहे.
advertisement
ठाकरेंचा मोहरा शिंदेंकडे, मातोश्रीवरून थेट हालचाली...
शिवसेना ठाकरे गटाचे सायन प्रतीक्षा नगर मधील माजी नगरसेवक रामदास कांबळे यांनी शिवसेना शिंदे गटात पक्ष प्रवेश केला. रामदास कांबळे हे प्रभाग क्रमांक 173 चे माजी नगरसेवक असून त्यांनी प्रभाग समिती अध्यक्ष म्हणून जबाबदारी पार पाडली आहे. तर, युवा सेनेचे विस्तारक म्हणून त्यांच्याकडे जबाबदारी होती. त्यामुळे कांबळे यांचा शिंदे गटातील पक्ष प्रवेश अतिशय महत्त्वाचा असल्याचे म्हटले जात आहे.
'मातोश्री'वरून डॅमेज कंट्रोल...
रामदास कांबळे हे ठाकरे गटाला जय महाराष्ट्र करून शिंदे गटात प्रवेश करणार असल्याचे आज सकाळी समोर आले. त्यानंतर स्थानिक शिवसैनिकांनी संताप व्यक्त केला. शिवसैनिकांनी रामदास कांबळे यांच्या फलकाला काळं फासलं. मोठी घोषणाबाजी देखील करण्यात आली. प्रतीक्षानगर मधील माजी नगरसेवक रामदास कांबळे यांनी शिवसेना शिंदे गटात पक्ष प्रवेश केल्यानंतर मातोश्रीकडूनही डॅमेज कंट्रोलचे प्रयत्न झाले. डॅमेज कंट्रोल करण्यासाठी ठाकरे गटाने सायन प्रतिक्षा नगर येथील शाखेत स्थानिक शिवसैनिकांच्या उपस्थितीत तातडीने बैठक घेतली. या बैठकीत ठाकरे गटाचे खासदार अनिल देसाई उपस्थित होते. शिवसेना पक्षप्रमुख उद्धव ठाकरे यांनी खासदार अनिल देसाई यांच्या फोनवरून शाखेतील शिवसैनिकांशी संवाद साधला. यावेळी स्थानिक शिवसैनिक मातोश्रीसोबत असल्याची ग्वाही उपस्थितांनी दिली. आगामी निवडणुकीत रामदास कांबळे यांना चांगलाच धडा शिकवणार असल्याचे त्यांनी उद्धव ठाकरे यांना आपला निर्धार सांगितला.