मायरा ‘बिलीयरी अ‍ॅट्रेसिया’ या दुर्मिळ आणि गंभीर यकृतविकाराने त्रस्त होती. पाच महिन्यांची असताना तिला कावीळ झाल्यानंतर ठाण्याच्या ज्युपिटर रुग्णालयात दाखल करण्यात आले. तपासणीत तिच्या यकृताचा आकार मोठा झाल्याचे दिसून आले आणि ‘मायटोकॉन्ड्रियल ट्रायफंक्शन प्रोटीन डेफिशियन्सी’ या दुर्मिळ जनुकीय आजाराचे निदान झाले. जन्मानंतर पहिल्या 100 दिवसांत हा आजार निदान झाल्यास शस्त्रक्रियेने उपचार शक्य होतो. परंतु मायराच्या बाबतीत ते शक्य नसल्याने यकृत प्रत्यारोपण हाच एकमेव पर्याय होता.
advertisement
मायराच्या 59 वर्षीय आजोबांनी पुढे येत आपले यकृत दान करण्याचा निर्णय घेतला. तपासणीत त्यांचे यकृत मायरासाठी योग्य असल्याचे स्पष्ट झाले. प्रत्यारोपणाच्या वेळेस मायराची तब्येत गंभीर झाली होती. पोटात पाणी साचणे, रक्त न गुठळण्याची लक्षणे दिसून येत होती. बालकांचे यकृत हे त्यांच्या एकूण वजनाच्या केवळ 4–5 टक्के असते. त्यामुळे प्रौढ व्यक्तीच्या यकृतातील छोटा भागही तांत्रिकदृष्ट्या रोवताना अनेक अडचणी येतात.
डॉक्टरांनी अत्याधुनिक तंत्रज्ञानाचा वापर करत ही जटिल शस्त्रक्रिया यशस्वी केली. शस्त्रक्रियेनंतर मायराची प्रकृती हळूहळू सुधारली असून ती आता नियमित आहार घेत आहे. तिचे वजनही वाढले असून दोघांचीही प्रकृती चांगली आहे, अशी माहिती रुग्णालयातील लिव्हर ट्रान्सप्लांट विभागाचे प्रमुख डॉ. आनंद राममूर्ती यांनी दिली.