चांदीचा दर १ लाख १८ हजारांवर; गुंतवणूकदारांसाठी मोठी बातमी
गेल्या अवघ्या पाच दिवसांमध्ये दुसऱ्यांदा इतक्या मोठ्या फरकाने चांदी महागली आहे. सध्या चांदीचा भाव प्रति किलो १ लाख १८ हजार रुपये इतका झाला आहे. चांदीची ही विक्रमी दरवाढ प्रामुख्याने औद्योगिक मागणीमुळे होत आहे. स्मार्टफोनपासून ते सौर ऊर्जेच्या उपकरणांपर्यंत इलेक्ट्रॉनिक वस्तूंमध्ये चांदीचा वापर मोठ्या प्रमाणावर वाढला आहे. औद्योगिक मागणी वाढत असल्याने नैसर्गिकरित्या किमती वाढत आहेत.
advertisement
बाजारातील तज्ज्ञांनी आता एक मोठा दावा केला आहे: "चांदी दिवाळीपर्यंत २ लाख रुपयांचा टप्पा पार करेल!" ही बातमी गुंतवणूकदारांसाठी आनंदाची असली, तरी ज्यांच्या घरात यंदा लग्न आहे किंवा ज्यांना लक्ष्मीपूजनासाठी चांदी खरेदी करायची आहे, त्यांच्यासाठी मात्र ही दरवाढ मोठी चिंता घेऊन आली आहे.
चांदीच्या पाठोपाठ सोन्याच्या किमतीतही तेजी कायम आहे. मंगळवारी सोन्याचा भाव १ लाख २४ हजार ७०० रुपये प्रति १० ग्रॅम वर पोहोचला होता, यात दीड हजार रुपयांची दरवाढ झाली आहे. सोन्याचे दर इतके झपाट्याने वाढले आहेत की, सर्वसामान्य माणसाला आता सोनं खरेदी करणं दिवसेंदिवस अवघड होत चाललं आहे.
५ वर्षांत सोन्याने दिलेला परतावा पाहा
मागील काही वर्षांत सोन्याने गुंतवणूकदारांना कसा परतावा दिला, हे आकडेवारीवरून स्पष्ट होते. सोन्याचे दर (प्रति तोळा) पाहा:
सोन्याच्या दरांचा चढता आलेख
2020- 48651 प्रति तोळा
2021- 48720 प्रति तोळा
2022- 52670 प्रति तोळा
2023- 65330 प्रति तोळा
2024- 77913 प्रति तोळा
2025- 1,28,000 प्रति तोळा
अवघ्या पाच वर्षांत सोन्याच्या दरात दुप्पट पेक्षा जास्त वाढ झाली आहे. ही दरवाढ केवळ आर्थिक धोरणे किंवा महागाईमुळे नसून, जागतिक पातळीवर निर्माण झालेल्या तुटवड्यामुळे आणि सुरक्षित गुंतवणुकीसाठी सोन्या-चांदीकडे वळलेल्या गुंतवणूकदारांमुळे झाली आहे. सध्या सोन्या-चांदीचे दर रॉकेटच्या वेगाने धावत आहेत. दिवाळीत या मौल्यवान धातूंची खरेदी करायची की, फक्त दरवाढीचे आकडे पाहायचे, असा प्रश्न सर्वसामान्य ग्राहकांना पडला आहे.