'मी मुस्लिम आहे, रामायण हिंदू...', AR Rehman ने अखेर सोडलं मौन, ट्रोलर्सला दिलं सडेतोड उत्तर

ऑस्कर विजेते संगीतकार ए. आर. रहमान यांनी नुकतंच मुस्लिम असूनही नितेश तिवारी यांच्या आगामी ‘रामायण’ या बहुप्रतीक्षित सिनेमात काम करण्याबाबत आपले मत मांडले.

ए. आर. रहमान म्हणाले की कला आणि ज्ञानाला धार्मिक सीमा घालता येत नाहीत. या प्रकल्पावर ऑस्कर विजेते संगीतकार हंस झिमर यांच्यासोबत काम करणाऱ्या रहमान यांनी स्पष्ट केले की त्यांचे संगोपन असे झाले आहे की त्यांना लहानपणापासूनच भारतीय महाकाव्यांची माहिती आहे.

BBC Asian च्या यूट्यूब चॅनलवर दिलेल्या मुलाखतीत रहमान यांनी ‘रामायण’ मधील त्यांच्या सहभागाबद्दल आणि श्रद्धा व ओळख यासंबंधी प्रश्नांवर भाष्य केले. त्यांनी धार्मिक फूट आणि संकुचित मानसिकतेच्या वर उठण्याची गरज अधोरेखित केली.

रहमान म्हणाले,"मी ब्राह्मण शाळेत शिक्षण घेतले आहे आणि दरवर्षी आमच्याकडे रामायण आणि महाभारताचे सादरीकरण होत असे, त्यामुळे मला ही कथा माहिती आहे.”

रहमान यांनी सांगितले की महाकाव्याचे खरे सार धार्मिक ओळखीत नाही, तर मूल्ये आणि आदर्शांमध्ये आहे. ही कथा एखादी व्यक्ती किती सद्गुणी आणि उच्च आदर्श असलेली आहे याबद्दल आहे. लोक वाद घालू शकतात, पण मी त्या सगळ्या चांगल्या गोष्टींना महत्त्व देतो, ज्या तुम्ही शिकू शकता अशा कोणत्याही चांगल्या गोष्टींना.”

समाजाने संकुचित विचारांपलीकडे जाण्याची गरज असल्याचे रहमान यांनी नमूद केले. ते म्हणाले,“मला वाटते आपण लहान विचारसरणी आणि स्वार्थाच्या पलीकडे जायला हवे. जेव्हा आपण वर उठतो, तेव्हा आपण उजळून निघतो आणि ते खूप आवश्यक आहे. हंस झिमर यहुदी आहेत, मी मुस्लिम आहे आणि रामायण हिंदू आहे. हे भारतातून संपूर्ण जगात प्रेमासह पोहोचत आहे.”

नितेश तिवारी दिग्दर्शित आणि नमित मल्होत्रा निर्मित ‘रामायण’ हा चित्रपट अत्यंत भव्य स्वरूपात तयार होत आहे. चित्रपटात रणबीर कपूर भगवान राम, साई पल्लवी सीता आणि यश रावणच्या भूमिकेत दिसणार आहेत. हा दोन भागांचा चित्रपट दिवाळी 2026 आणि दिवाळी 2027 रोजी प्रदर्शित होणार आहे. कलाकारांमध्ये सनी देओल भगवान हनुमान, रवी दुबे लक्ष्मण, अरुण गोविल दशरथ आणि रकुल प्रीत सिंह शूर्पणखा यांच्या भूमिकेत असतील. ‘रामायण’ सुमारे 4,000 कोटी रुपयांहून अधिक बजेटमध्ये तयार होत आहे.