'बिग बॉस' फेम अभिनेत्री दिवाळीत आगीत होरपळली, पाठ जळाली, वडिलांच्या धाडसाने वाचला जीव

छोट्या पडद्यावरील लोकप्रिय अभिनेत्री आणि 'बिग बॉस'फेम प्रिया मलिकसाठी ही दिवाळी अत्यंत वाईट ठरली आहे. ऐन दिवाळीत अभिनेत्री एका मोठ्या अपघातातून थोडक्यात बचावली आहे. अभिनेत्रीचा जीव थोडक्यात बचावला असला तरी तिची प्रकृती गंभीर आहे.

प्रिया मलिक आपल्या कुटुंबासोबत दिवाळी साजरी करत असताना एका भयंकर अपघाताची शिकार झाली आहे. आता सोशल मीडियाच्या माध्यमातून अभिनेत्रीने अपघाताची बातमी चाहत्यांसोबत शेअर केली आहे.

प्रिया मलिकने दिलेल्या माहितीनुसार, अभिनेत्री शेजाऱ्यांसोबत फोटो काढत असताना हा अपघात झाला आहे. दिव्याच्या ज्योतीमुळे तिच्या कपड्यांना आग लागली आणि संपूर्ण पाठ जळाली".

प्रियाने सोशल मीडियावर आपल्या पोस्टमध्ये लिहिलं आहे,'मी माझ्या शेजाऱ्यांसोबत फोटो काढत होते आणि काही समजण्याआधीच माझ्या उजव्या खांद्यावरून ज्वाळा उठताना पाहिल्या आणि जाणवले की माझी संपूर्ण पाठ जळत आहे. मी खऱ्या ज्वाळांबद्दल बोलते आहे, एखाद्या छोट्या-मोठ्या आगीबद्दल नाही. सुदैवाने माझ्या वडिलांनी माझे जळते कपडे लगेच फाडले, कारण भाजण्यापासून वाचण्याचा तोच एकमेव मार्ग होता. पण या घटनेने मला आणि आमच्या कुटुंबाला प्रचंड मानसिक धक्का बसला आहे."

प्रिया पुढे म्हणाली की,"लोक अनेकदा सुरक्षितपणाकडे दुर्लक्ष करतात आणि असा विचार करतात की आपल्यासोबत काही वाईट होऊच शकत नाही. पण काल रात्री मला जाणवले की एक लहानशी चूकही जीव घेऊ शकते. माझे वडील खरोखरच हिरो आहेत".

प्रियाची प्रकृती आता स्थिर असून तिला खांद्यावर आणि पाठिवर जळजळ होत आहे. यंदाच्या दिवाळीने अभिनेत्रीला आयुष्यभरासाठी महत्त्वाची शिकवण दिली आहे.

प्रिया मलिकने आपल्या चाहत्यांना काळजीपूर्वक दिवाळी साजरी करण्याचा सल्ला दिला आहे. तसेच फटाके फोडताना आवश्यक खरबदारी घेण्यासही अभिनेत्रीने सांगितलं आहे.