'मला वाटलं होतं रणवीर सिंग...' Dhurandhar पाहून URI फेम मराठमोळ्या अभिनेत्याला बसला धक्का

मुंबई: सध्या संपूर्ण देशात अभिनेता रणवीर सिंगच्या 'धुरंधर' या स्पाय थ्रिलर चित्रपटाने बॉक्स ऑफिसवर अक्षरशः धुमाकूळ घातला आहे.

५ डिसेंबरला प्रदर्शित झालेल्या या चित्रपटाच्या दमदार कथानकामुळे आणि कलाकारांच्या परफेक्ट अभिनयामुळे तो प्रेक्षकांच्या मनावर राज्य करत आहे.

याच चित्रपटाबद्दल मराठी चित्रपटसृष्टीतील लोकप्रिय अभिनेता योगेश सोमण यांनी आपले अत्यंत स्पष्ट आणि थेट मत मांडले आहे, ज्यामुळे रणवीर सिंगच्या अभिनयाची चर्चा पुन्हा एकदा जोर धरू लागली आहे.

योगेश सोमण यांनी 'धुरंधर' पाहिल्यानंतर एक व्हिडिओ शेअर केला. चित्रपटाच्या तांत्रिक बाजूवर बोलताना ते म्हणाले की, हा सिनेमा केवळ मनोरंजनापुरता मर्यादित नाही, तर त्याची मांडणी इतकी अचूक आहे की तो ऐतिहासिक डॉक्युमेंटेशन असल्याचा अनुभव देतो.

कथेमध्ये IC 814 विमान अपहरण, संसदेवरील हल्ला, २६/११ चा मुंबईवरील हल्ला आणि पाकिस्तानमधील खोट्या नोटांच्या निर्मितीची गोष्ट यांसारखे महत्त्वाचे आणि गंभीर घटक अत्यंत तर्कशुद्ध पद्धतीने जोडले आहेत.

दिग्दर्शक आदित्य धर यांनी पटकथा आणि दिग्दर्शन उत्तम केल्यामुळे कथा काल्पनिक असूनही सत्यासारखी वाटते, असे त्यांचे मत आहे.

याचदरम्यान, योगेश सोमण यांनी रणवीर सिंगच्या अभिनयाबद्दल जे मत व्यक्त केले, ते सर्वांसाठी लक्षवेधी ठरले. सोमण म्हणाले, "बाकी कलाकारांनी आपल्या भूमिका उत्कृष्टपणे साकारल्या आहेत, पण मला जो नट पूर्वी आवडत नव्हता किंवा उथळ वाटायचा, त्याने या सिनेमात खूपच दमदार भूमिका केली आहे."

रणवीर सिंगच्या काही पूर्वीच्या विदुषकी चाळ्यांचा संदर्भ देत सोमण यांनी सांगितले की, पूर्वीच्या सार्वजनिक कार्यक्रमांमध्ये त्याला रणवीरचा अभिनय आवडायचा नाही. "मात्र आश्चर्यकारकपणे, या सिनेमात त्याने शांतपणे आणि नैसर्गिक पद्धतीने आपले काम केले आणि खूप उजवी भूमिका साकारली."

एका अभिनेत्याने दुसऱ्या अभिनेत्याबद्दलचे आपले सुरुवातीचे मत बदलून इतके स्पष्ट आणि थेट कौतुक करणे, हे 'धुरंधर'च्या पटकथेची आणि रणवीर सिंगच्या अभिनयाची ताकद दाखवते. या प्रतिक्रियामुळे प्रेक्षक आता अधिक उत्सुकतेने सिनेमा पाहायला जात आहेत.

हा सिनेमा केवळ बॉक्स ऑफिसवर हिट नाही, तर एक दर्जेदार सिनेमॅटिक अनुभव देणारा आहे, हे योगेश सोमण यांच्या मतावरून सिद्ध झाले आहे.