1-2 नाही, तर तब्बल तीन OTT प्लॅटफॉर्मवर पाहता येणार Jolly LLB 3; कधी होणार रिलीज?

मुंबई: अक्षय कुमार आणि अर्शद वारसीची धमाकेदार जुगलबंदी असलेला कोर्टरूम कॉमेडी चित्रपट 'जॉली एलएलबी ३' अजूनही चित्रपटगृहांमध्ये धुमाकूळ घालत आहे. १९ सप्टेंबरला प्रदर्शित होऊन अनेक आठवडे झाले तरी या चित्रपटाची चर्चा सुरूच आहे.

जवळपास १२० कोटी रुपये निर्मिती खर्च असलेल्या 'जॉली एलएलबी ३' ने व्यावसायिकदृष्ट्या चांगलीच छाप पाडली आहे. बॉक्स ऑफिस ट्रॅकर 'सॅकनिल्क'च्या आकडेवारीनुसार, या चित्रपटाने भारतात १०८.६५ कोटी रुपये कमावले आहेत. तर जगभरात या चित्रपटाने तब्बल १५७.७ कोटी रुपये कमावले आहेत. या चित्रपटाने आपले बजेट सहज वसूल केले असून, हिट चित्रपटांच्या यादीत आपले स्थान पक्के केले आहे.

या चित्रपटाच्या समीक्षेत म्हटले आहे की, "जॉली एलएलबी ३' ने हे सिद्ध केले आहे की, मनोरंजन करतही सामाजिक समस्यांना व्यावसायिक सिनेमामध्ये प्रभावीपणे मांडता येते." या चित्रपटात विनोद, सशक्त भावनिक क्षण आणि सामाजिक विचार यांचा उत्तम मेळ साधला आहे.

या चित्रपटातील काही दृश्ये तुम्हाला खळखळून हसायला लावतील, तर काही डोळ्यात अश्रू आणतील. कथेचा गाभा गंभीर असला तरी चित्रपट कुठेही प्रवचन दिल्यासारखा किंवा माहितीपटासारखा वाटत नाही. तो सुरुवातीपासून शेवटपर्यंत प्रेक्षकांना खिळवून ठेवतो.

सुभाष कपूर यांनी दिग्दर्शित केलेल्या या चित्रपटात अक्षय कुमार (जॉली मिश्रा) आणि अर्शद वारसी (जॉली त्यागी) यांच्या मुख्य भूमिका आहेत. त्यांना सौरभ शुक्ला, अमृता राव आणि हुमा कुरेशी यांसारख्या कलाकारांची साथ मिळाली आहे.

ज्या चाहत्यांना हा सिनेमा थिएटरमध्ये पाहता आला नाही, ते आता घरबसल्या हा सिनेमा पाहू शकणार आहेत. चाहत्यांसाठी एक मोठी आणि आनंदाची बातमी आहे, या चित्रपटाच्या ओटीटी रिलीजची तारीख आता नक्की झाली आहे.

प्रेक्षकांसाठी सर्वात मोठी चांगली बातमी म्हणजे 'जॉली एलएलबी ३' एकाच नव्हे, तर अनेक ओटीटी प्लॅटफॉर्मवर रिलीज होणार आहे. मिळालेल्या माहितीनुसार, हा चित्रपट १४ नोव्हेंबर २०२५ पासून जिओ सिनेमा, हॉटस्टार आणि नेटफ्लिक्स या तीन प्रमुख ओटीटी प्लॅटफॉर्मवर पाहता येणार आहे. निर्मात्यांकडून अधिकृत घोषणा येणे बाकी असले तरी, पुढच्या महिन्यात ही कोर्टरूम कॉमेडी ऑनलाइन पाहण्याची संधी प्रेक्षकांना मिळणार आहे.