2 मुलं-पत्नीला सोडून हिरोने केलं दुसरं लग्न, 6 महिन्यांची प्रेग्नंट आहे नवी बायको, सोशल मीडियावर खळबळ

मुंबई : सिनेसृष्टीत नात्यांचं गणित नेहमीच गुंतागुंतीचं राहिलं आहे. कोणतं नातं कधी जुळेल आणि कधी तुटेल, हे सांगणं खरंच कठीण. पण दाक्षिणात्य सिनेसृष्टीतून सध्या एक अशी धक्कादायक बातमी समोर आली आहे, ज्यामुळे चाहतेही चक्रावले आहेत आणि सोशल मीडियावर तर टीकेची झोड उठली आहे.

एका विवाहित आणि दोन मुलांचा बाप असलेल्या अभिनेत्याने चक्क दुसरं लग्न केलं आहे. विशेष म्हणजे, लग्नाच्या वेळी त्याची दुसरी पत्नी सहा महिन्यांची गरोदर आहे. या गुपचूप लग्नाचा पर्दाफाश खुद्द तिनेच सोशल मीडियावर फोटो पोस्ट करून केला आहे.

या अभिनेत्याचं नाव आहे मधमपट्टी रंगराज, तर त्याची दुसरी पत्नी आहे प्रसिद्ध डिझायनर जॉय क्रिसिल्डा. जॉयने तिच्या इंस्टाग्राम अकाऊंटवर मधमपट्टीसोबत लग्नाच्या वेशातील काही फोटो शेअर केले आहेत. या फोटोंमध्ये जॉयने लाल रंगाची साडी नेसली आहे, तर मधमपट्टीने धोतर-कुर्ता परिधान केला आहे. पण या सगळ्यामध्ये, जॉयच्या स्पष्टपणे दिसणाऱ्या बेबी बंपने सगळ्यांचं लक्ष वेधून घेतलं आहे, ज्यामुळे या लग्नाभोवतीचं गूढ आणखी वाढलं आहे.

जॉयने एक फोटो शेअर करताना कॅप्शनमध्ये लिहिलं आहे, "बेबी लोडिंग २०२५. आम्ही प्रेग्नंट आहोत, प्रेग्नंसीचे ६ महिने." तर आणखी एका फोटोत तिने "मिस्टर अँड मिसेस रंगराज" असं लिहीत लग्नाची पुष्टी केली आहे.

जॉयने जेव्हा हे फोटो पोस्ट केले, तेव्हा चाहते चांगलेच गोंधळले. कारण, मधमपट्टी विवाहित असल्याचं आणि त्याला दोन मुलं असल्याचं सगळ्यांना माहीत होतं. त्याच्या पहिल्या पत्नीनेही तिच्या इंस्टाग्राम बायोमध्ये 'मधमपट्टी रंगराजची पत्नी' असा उल्लेख केला आहे, ज्यामुळे चाहत्यांमध्ये संभ्रम निर्माण झालाय.

मधमपट्टी रंगराज तमिळ फिल्म इंडस्ट्रीतील एक उगवता चेहरा आहे. त्याने 'मेहंदी सर्कस' या चित्रपटातून करिअरची सुरुवात केली असली, तरी तो 'कुक विथ अ क्लाऊन' या लोकप्रिय शोच्या पाचव्या आणि सहाव्या सीझनमुळे घराघरात पोहोचला.

हा शो सुरू असतानाच मधमपट्टी विवाहित असतानाही त्याच्या अफेअरच्या चर्चा ऑनलाइन व्हायरल झाल्या होत्या. आता या फोटोंनी आणि जॉयच्या प्रेग्नंसीच्या घोषणेने तर साऊथ इंडस्ट्रीत मोठी खळबळ उडवून दिली आहे.

या रहस्यमय लग्नाबद्दल आणि प्रेग्नंसीबद्दल समजल्यापासून चाहते मधमपट्टीला धारेवर धरत आहेत. 'पहिल्या पत्नीला घटस्फोट न देताच दुसरं लग्न केलं का?', 'लग्नाआधीच गरोदर होती का?', 'शुभ मुहूर्तानुसार हे आषाढ महिन्यातलं लग्न असूच शकत नाही, मग जुना फोटो का व्हायरल केला?', असे अनेक प्रश्न नेटकरी विचारत आहेत.

आता या सगळ्यावर आणखी एक चर्चा सुरू झाली आहे की, जॉय क्रिसिल्डाने हे फोटो मुद्दाम व्हायरल केले का? आषाढ महिना सुरू असल्याने, या काळात लग्न होत नाहीत. त्यामुळे जॉयने शेअर केलेला लग्नाचा फोटो जुना असू शकतो आणि मधमपट्टीला हे फोटो व्हायरल झाल्याने खूप त्रास झाल्याचीही कुजबूज सुरू आहे. काही नेटकरी तर जॉय क्रिसिल्डाने मधमपट्टी रंगराजला ब्लॅकमेल करण्यासाठी असे फोटो पोस्ट करून खळबळ उडवून दिली आहे का, असाही प्रश्न विचारत आहेत.

या सगळ्या प्रकरणावर मधमपट्टी रंगराज आणि त्याच्या पहिल्या पत्नीने अद्याप कोणतीही अधिकृत प्रतिक्रिया दिलेली नाही. पण या लग्नाच्या आणि प्रेग्नंसीच्या बातमीने दाक्षिणात्य सिनेसृष्टीत सध्या तरी वादळासारखं वातावरण निर्माण केलं आहे.