Tanya Mittal Home Tour: किचनमधली लिफ्ट, 2500 sq ft ची कपड्यांची आलिशान खोली! फेक म्हणणाऱ्यांना तान्या मित्तलचं सणसणीत उत्तर

मुंबई: 'बिग बॉस १९' च्या घरात जेव्हा तान्या मित्तलने आपल्या आलिशान आयुष्याबद्दल गप्पा मारायला सुरुवात केली, तेव्हा घरातील स्पर्धकांपासून ते सोशल मीडियावरील युजर्सपर्यंत सर्वांनीच तिची खिल्ली उडवली. "ही किती खोटं बोलतेय!", "हिचं सगळं फेक आहे", अशा कमेंट्सचा पाऊस पडला.

अगदी तिने ज्यांना मित्र मानलं, त्यांनीही तिच्या श्रीमंतीच्या गोष्टींवर विश्वास ठेवला नाही. पण आता शो संपल्यावर तान्याने कोणाशीही वाद न घालता, शांतपणे एक-एक करून सर्वांना पुरावे द्यायला सुरुवात केली आहे.

तान्या मित्तलने शोमध्ये एका गोष्टीचा वारंवार उल्लेख केला होता, तो म्हणजे तिच्या किचनमधील लिफ्ट. तिने सांगितलं होतं की, "आमच्या किचनमध्ये एक लिफ्ट आहे. खाली जेवण तयार झालं की ते लिफ्टमध्ये ठेवलं जातं आणि वरच्या मजल्यावरील किचनमध्ये ते आपोआप पोहोचतं." तेव्हा सर्वांना हे 'आठवं आश्चर्य' वाटलं होतं आणि अनेकांनी तिला ट्रोल केलं होतं.

पण आता तान्याने चक्क आपल्या घराचा 'होम टूर' व्हिडिओ शेअर केला आहे. एका न्यूड पोर्टलला दिलेल्या मुलाखतीत तिने कॅमेरासमोर ती लिफ्ट दाखवली आहे. जेव्हा अँकरने आश्चर्याने विचारलं की हे काय आहे? तेव्हा तान्या हसत म्हणाली, "हीच ती किचन लिफ्ट आहे, ज्यावरून लोकांनी मला ट्रोल केलं होतं." तिने हसत हसत या लिफ्टला तिचं 'आठवं आश्चर्य' म्हटलं आहे.

तान्याचं घर एखाद्या ५-स्टार किंवा ७-स्टार हॉटेलपेक्षाही भव्य असल्याचा तिचा दावा आता खरा ठरताना दिसत आहे. शोमध्ये नीलम गिरीला तान्या म्हणाली होती की, तिच्या घरात २५०० स्क्वेअर फुटांचा एक संपूर्ण मजला फक्त तिच्या कपड्यांसाठी आणि फॅशनच्या वस्तूंसाठी राखीव आहे.

घराच्या प्रत्येक मजल्यावर ५ नोकर तैनात असतात आणि त्यांच्याकडे एकूण ७ ड्रायव्हर्स आहेत. तान्याच्या मते, तिचं घर इतकं सुंदर आहे की पृथ्वीवर जर स्वर्ग कुठे असेल, तर तो तिच्या घरासारखाच दिसेल.

केवळ घरच नाही, तर तान्याने तिच्या फॅक्टरीजचाही व्हिडिओ दाखवला आहे. बिग बॉसच्या घरात असताना तान्याला तिच्या लॅविश लाईफस्टाईलमुळे आणि १५० बॉडीगार्ड्सच्या दाव्यामुळे प्रचंड ट्रोल करण्यात आलं होतं.

मात्र, आता एकामागून एक येणारे हे व्हिडिओ पाहता, तान्या फक्त हवेत गप्पा मारत नव्हती, तर ती खरोखरच एका मोठ्या साम्राज्याची मालकीण आहे, हे सिद्ध होत आहे. थोडक्यात काय, तर बिग बॉसच्या घरात ज्या गोष्टींना सर्वांनी नॉनसेन्स म्हटलं, त्या गोष्टी आज सत्यात पाहून ट्रोलर्सना आता तोंड लपवायला जागा उरलेली नाही.