Marathwada Weather : विजांचा कडकडाट अन् वादळी वारे, मराठवाड्यात पाऊस कोसळणार, 5 जिल्ह्यांना अलर्ट

ऑक्टोबरच्या शेवटच्या आठवड्यात म्हणजे आज दिनांक 27 रोजी मराठवाड्यात पुन्हा पावसाची शक्यता भारतीय हवामान विभागाने वर्तवली आहे. छत्रपती संभाजीनगर, नांदेड, लातूर, धाराशिव आणि बीड या जिल्ह्यांमध्ये हवामान विभागाने यलो अलर्ट जारी केला असून या भागांमध्ये तुरळक ठिकाणी वादळ, मेघगर्जना आणि विजांच्या कडकडाटासह सरी कोसळण्याची शक्यता आहे.

हवामान विभागाकडून मिळालेल्या माहितीनुसार आज या जिल्ह्यांमध्ये आकाश ढगाळ राहणार असून काही ठिकाणी ताशी 30 ते 40 किलोमीटर वेगाने वारे वाहण्याची शक्यता आहे. स्थानिक स्तरावर विजांच्या कडकडाटासह हलका ते मध्यम पाऊस पडू शकतो असा अंदाज विभागाने वर्तवला आहे.

जालना, परभणी आणि हिंगोली या जिल्ह्यांमध्ये हवामान विभागाकडून कोणताही अलर्ट जारी करण्यात आलेला नसला तरी या भागांमध्येही हलका ते मध्यम स्वरूपाचा पाऊस पडण्याची शक्यता कायम आहे. त्यामुळे नागरिकांनी हवामानातील बदलावर लक्ष ठेवण्याचे आवाहन हवामान विभागाने केले आहे.

पुढील 24 तासांमध्ये मराठवाड्यातील बहुतेक भागांमध्ये आकाश ढगाळ राहणार असून काही ठिकाणी हलक्या ते मध्यम सरी कोसळण्याची शक्यता आहे. मराठवाड्यातील तापमानात थोडीशी घट होण्याची शक्यताही हवामान विभागाकडून वर्तवण्यात येत आहे.

हवामान विभागाच्या माहितीनुसार बंगालच्या उपसागरातील कमी दाबाच्या क्षेत्रामुळे आणि वायव्य दिशेने येणाऱ्या आर्द्रतेमुळे मराठवाड्याच्या हवामानात हा बदल दिसून येत आहे. पुढील दोन दिवसांपर्यंत ढगाळ वातावरण आणि अधूनमधून सरींचा क्रम सुरू राहण्याची शक्यता हवामान विभागाने वर्तवली आहे.