Lakshmi Pujan 2025: यंदाचं लक्ष्मीपूजन 20 की 21 ऑक्टोबरला होणार? जाणून घ्या तिथी आणि शुभमुहूर्त

दिवाळी हा हिंदू धर्मातील सर्वात महत्त्वाचा सण आहे. दिव्यांची रोषणाई, फराळाची मजा आणि आनंदाचे वातावरण यामुळे सगळेजण वर्षभर या सणाची आतुरतेने वाट पाहतात. दिवाळीत लक्ष्मीपूजन, भाऊबीज आणि पाडवा या सणांना खास महत्त्व असतं.

हिंदू पंचांगानुसार दिवाळीचा सण कार्तिक महिन्यातील अमावस्येला साजरा केला जातो. यंदा म्हणजेच 2025 च्या दिवाळीत हे सण नेमके कोणत्या दिवशी साजरे होणार आहेत आणि यंदाची दिवाळी कधी आहे, याबाबत अनेकांच्या मनात संभ्रम आहे. याविषयी जाणून घेऊयात.

धनत्रयोदशी हा दिवाळीचा पहिला दिवस आहे. या दिवशी मुख्यतः खरेदी करणे आणि लक्ष्मी-कुबेर पूजेला विशेष महत्त्व आहे. घरात सोने, चांदी किंवा नवीन वस्तू खरेदी केल्यास संपत्ती आणि समृद्धी वाढते असे मानले जाते. या वर्षी खरेदीसाठी शुभ वेळ दुपारी 12:18 पासून 19 ऑक्टोबर रोजी दुपारी 01:51 पर्यंतचा वेळ आहे.

नरक चतुर्दशी हा दिवाळीचा दुसरा दिवस असतो. या दिवसाचं महत्त्व म्हणजे, या दिवशी भगवान श्रीकृष्णाने नरकासूर राक्षसाचा वध केला. आणि त्यानंतर तेलाने स्नान करून आपला विजय साजरा केला. याच परंपरेनुसार, नरक चतुर्दशीला पहाटे अभ्यंगस्नान करण्याची प्रथा आहे.

दिवाळीचा मुख्य दिवस म्हणजे लक्ष्मीपूजन. यंदा कार्तिक अमावस्या 20 ऑक्टोबर रोजी दुपारी 3:44 वाजता सुरू होऊन 21 ऑक्टोबर रोजी सायंकाळी 5:54 वाजेपर्यंत चालणार आहे. लक्ष्मीपूजनाचा शुभ मुहूर्त संध्याकाळी 7:08 ते 8:18 पर्यंत आहे. त्यामुळे दिवाळीचा मुख्य सण 20 ऑक्टोबरला साजरा केला जाणार आहे.

दिवाळी पाडवा नवविवाहित जोडप्यांसाठी विशेष महत्त्वाचा दिवस आहे. या दिवशी राजा बलि यांच्या पूजा करून पाडवा साजरा केला जातो. नवविवाहित वधु-वरांसाठी हा दिवस फार खास मानला जातो.

दिवाळीचा शेवटचा आणि भावा बहिणीच्या पवित्र नात्याचा उत्सव म्हणजेच भाऊबीजेचा सण साजरा करतात. या दिवशी बहिण भावाला ओवाळते आणि भावाच्या सुख समृद्धीसाठी प्रार्थना करते. तर भाऊ बहिणीला भेटवस्तू देतो आणि तिचे रक्षण करण्याचं वचन देतो.