पुणे-मुंबई एक्स्प्रेस वे वर मृतदेहांचा खच अन् रक्ताचा सडा, विठ्ठलाच्या भेटीची इच्छा अधुरीच राहिली, काळजाचा थरकाप उडवणारे Photos

मोठी बातमी समोर आली आहे. पंढरपूरला दर्शनासाठी निघालेल्या भाविकांच्या बसचा भीषण अपघात झाला आहे. या अपघातामध्ये पाच जणांचा मृत्यू झाला असून 49 जण जखमी झाले आहेत.

जखमी भाविकांपैकी सात ते आठ जणांची प्रकृती गंभीर असून मृतांचा आकडा वाढण्याची भिती व्यक्त केली जात आहे. जखमींना स्थानिकांच्या मदतीनं उपचारासाठी एमजीएम रुग्णालयात दाखल करण्यात आलं आहे.

मध्य रात्री एकच्या सुमारास मुबई-पुणे एक्स्प्रेस वे वर पनवेल तालुक्याच्या हद्दीमध्ये हा अपघात घडला आहे. अपघातग्रस्त वाहनातील सर्व प्रवासी हे डोंबिवली, नीलजे लोढा येथील रहिवासी असल्याची माहिती समोर आली आहे.

घटनेबाबत अधिक माहिती अशी की, मुबई पुणे एक्स्प्रेस वे वर पनवेल तालुका हद्दीत पंढरपूर येथे जाणाऱ्या बसला रात्री एकच्या सुमारास भीषण अपघात झाला असून बसमध्ये 54 प्रवाशी होते. त्यापैकी 5 जणांचा मृत्यू झाला असून 49 जणांवर उपचार सुरू आहे.

मुंबई पुणे एक्स्प्रेसवर रात्री एकच्या सुमारास पंढरपूरला जाणाऱ्या बसची धडक एका ट्रॅक्टरला झाल्याने बस थेट रस्त्याच्या खाली पलटी झाली, अशी माहिती नवी मुंबईचे पोलीस उपायुक्त विवेक पानसरे यांनी दिली.

सर्व प्रवाशी डोंबिवली निळजे येथील असल्याची माहिती समोर आली असून, घटनेबाबत पुढील तपास सुरू असल्याचं पोलिसांनी सांगितलं. या घटनेनं सर्वत्र हळहळ व्यक्त होत आहे.

दरम्यान हे सर्व भाविक वारीनिमित्त पंढरपूरला चालले होते. मात्र वाटेतच बसचा भीषण अपघात झाला आहे, घटनेची माहिती मिळताच पोलिसांनी तातडीनं घटनास्थळी धाव घेतली.