Weather Alert: रविवारचा दिवस पावसाचा, पुणे ते कोल्हापूर धो धो कोसळणार, 24 तासांसाठी अलर्ट

श्रावण महिन्याच्या अखेरीस राज्यातील पावसाचा जोर ओसरला होता. आता पुन्हा पश्चिम महाराष्ट्रासह काही भागात पावसाची तीव्रता वाढत आहे. पुढील 24 तास पश्चिम महाराष्ट्रातील काही भागात जोरदार पावसाची शक्यता हवामान विभागाने वर्तवली आहे. 24 ऑगस्टचा हवामान अंदाज जाणून घेऊ.

पुणे जिल्ह्याला आज पुन्हा यलो अलर्ट देण्यात आला असून घाटमाथा भागात देखील पावसाचा जोर राहील. या काळात ताशी 30 ते 40 किमी वेगाने वारे वाहण्याची शक्यता असून ढगांचा गडगडाट आणि विजांसह पाऊस होईल. पुढील काही दिवस पावसाची हीच स्थिती कायम राहील.

सातारा जिल्ह्यात देखील रविवारी पावसाचा इशारा देण्यात आला आहे. पुढील 24 तास साताऱ्यासह घाटमाथ्यावर जोरदार पावसाचा अंदाज आहे. या काळात ताशी 30 ते 40 किमी वेगाने वारे वाहणार असून विजांच्या कडकडाटात काही ठिकाणी मुसळधार पावसाचा अलर्ट देण्यात आला आहे.

कोल्हापूरमध्ये 2 दिवस पावसाने काहीशी उघडीप घेतली होती. आता पुन्हा कोल्हापूर जिल्ह्यासह घाटमाथ्याच्या भागात पावसाचा अंदाज आहे. हवामान विभागाने पुढील 24 तासांसाठी यलो अलर्ट दिला असून या काळात वेगवान वारे आणि विजांसह पाऊस होईल.

सांगली आणि सोलापूर जिल्ह्यात पुढील काही काळ हवामानाचा कोणताही इशारा देण्यात आलेला नाही. आज तुरळक ठिकाणी हलक्या पावसाची शक्यता आहे. तर हवामान काही प्रमाणात ढगाळ राहील.